Read Poumei Naga JOB 40 Bible Online

JOB 40 - Poumei Naga bible

JOB 40

¹MAPAO nou Job hi paoe: Job, ne hali hala soulou süo Ramai ye vawe; Chuo ne vapu moa bailai deho, chinou-a buyu chitao khe peilaige?

³MAPAOwo, E vo-a nou chi paowure. Enou dai chila peilou khailai? E halia paopure donou tepu khailai more.

⁵Enou paozüa buyu jünou la-a paopare.

⁶Süthaisü MAPAO nou teikhai teirü hrohinou Job hi chi paopu peie.

⁷Chuo ne poutumai ali büa sah khyavealoua latsülo, ae Enou nouyu chitao sü chila peikhaio.

⁸E hai mah-zü thaifüa vah soumoe tea ne paolaiwu? Ne Eye paomah peiwua lah ne züa baie tea soulaiwu?

⁹Ne Enou khouyu büa khouwu? Nevei paila hai teisüyu büa chipaoshu avei pai railou süvu?

¹⁰Sütoulouzü ne-a lah tsükhouyu ae khaophu soulou veiyu mai ali soua tashu lalo, alia aduso ae aveih ava nanou sabanü soua banoulo.

¹¹Khaophou souyu maitaoye zhukhaio; nevei lekha rarou nanou puletaoye sounakou khaipei khaio.

¹²Ovai, puletaoye zhuloua painakou khaipei khaio; mai ashi maitaoye puletao nou la-a buyu buh hinou khoukhao peikhaio.

¹³Puletao mai hrülaiye sü deikhe daovu khaio; ae athai maivei teidei hinou phukhai peio.

¹⁴Sütoulouzü neye paoshoyu sü Enou rairai khana soupeilai, alia ne hai lah nenou veilou ngalou-a baie tea E-a aetoulai.

¹⁵Behemoth tea kuyu khaona adu nasü zhukhaio, Enou neye soupeiyu büa puh-a soupeie. Puh sü cho büa pou touwe,

¹⁶ana puhvei pfüphao hai daizhou koute khouchi-e, ae puhvei vasou hi daizhou koute khouko bue!

¹⁷Puhvei mi sü sedar süü ali büa bue, ae puhvei phi hi souke buyu taosü khouchishoe.

¹⁸Puhvei raotao hai baosahu büa chiwe, ae puhvei phi sü hu büa khou-e.

¹⁹Enou soupeiyu avei bashatao hinou khupa palai nasüe! Puhye Soupeipu likhei puh jünou ngalou süa baie.

²⁰Puh sü pou tou-a rekhaonatao nou ko-a buyu deichi hinou dupa-a baie.

²¹Puh sü raishu hrohinou züe, ae dzüta bvü hinou hrüa buyu pou hrohinou tutsüa buwe.

²²Reipe hi hrüyu poube ae süübetao nou puh vei baibuh soupeie.

²³Reidzü dukouyu sü puhnou piyu hae, Jordan rei nou dupa puhvei pah shopei-a buyuma puhsü kaonasei tea bua baiwe.

²⁴Thaonou puhvei nghithou soushawua puhye nülou süe? Thaonou puhye rüh hinou muloua puhvei nghou voupei lousüe?