Read Poumei Naga JOB 41 Bible Online

JOB 41 - Poumei Naga bible

JOB 41

¹Ne khasühu alinou poa Leviathan khaonaye sülou süwu? Mokhaia rai alinou puhvei mü-lee sü phulou süwu?

²Ne puhvei nghou hi rai thaithou lousüwu? Mokhaia puhvei khou hinou hurai polou khilou süwu?

³Puhye phapeio tea ne hi kholaiwu? Puhye zhuvea leshi peio tea ne hi paolaiwu?

⁴Puhnou neye koa vo soulaiwu? Teisa nou nevei kuvah sou-a bailai tea ne hi puhnou chaachou soua paolaiwu?

⁵Ki hinou chiyu raohou ali büa puhye rai khikhai lousüwu, mokhaia kilai naotu paiye panou sousava peiloure donou tea puhye nükhai lousüvu?

⁶Kha phouyu mainou puhye nüloua zholou süwu? Huha soumai nou puhye datha loua vazho lousüwu?

⁷Ne puhnou tuchüyu buh hi khaphya nou phyalousüwu, mokhaia khaphya hu nou puhvei pei kasha lousüvu?

⁸Vuli puhye dao-a ne puhye duyu thaio; nenou puhye duyu nasü hakilia ngaikhai laimoe!

⁹Mai talia Leviathan khaona naye ngaolouyu maisü khupaloua kaota-a bailai.

¹⁰Puhvei lekha soupa peiyu thaisü, puh hai zhaipou shishoe; mai talinoua puh nghoujü takou lalou pi-e.

¹¹Thaonou puhye duloua hriyu bue? Deiphao maili koute-a süsü soulou hoe.

¹²Leviathan vei phi vanou E ne hi paongaolai, ae puh hai daizhou koute due alia khouwe touyu vanou paongao peilai.

¹³Mai lia puhvei hee hai laolou hoe, mokhaia puhnou pfüa buyu puhvei reihna nasü khüthou louhoe.

¹⁴Thaonou puhvei mü souhepa lousüe, ngaopi sho-a buyu puhvei hutao sü thaonou soungapa lousüe?

¹⁵Puhvei phaosü rüh nou shoshosoua soukhaitoue, süsü dakhathou mutou khaitoua chuh büa khouwe.

¹⁶Alinou ali vei phao hi khouchi sho-a nou soumu khaitoue, süko hisü teikhai ssü koute-a loulou hoe.

¹⁷Sütao teitei hai chisho-a nou soumu khaitouyu hai halinoua daokhopa louhoe.

¹⁸Puhnou shaoyu phaki mei keipha phawe, alia puhvei nghithou hai teinghi nou phuyu büa reipha phawe.

¹⁹Puhvei mü hinou meikei sü reidzü küpayu büa küpawe,

²⁰Puhvei nghou hinou meikhao sü khaopawe, li ali khe hinou pouhou deipeiyu phaki meikhao payu büa pawe.

²¹Puhvei ssü haipa haithouyu hai mei houkei louwe, meikei sü puhvei mü hinou taopawe.

²²Puhvei ngurao hai khouchi shoe, puhye ve dao-a ngaoyu mai hrülai sü ngaoposhu pi-shiwe.

²³Puhvei hee hia khouchi moyu buhtou ali-a hae; puhvei hee sü khouposhu hu büe.

²⁴Puhvei chuh lethou hai halia piyu hae, thou reiyu chuh ali büa khouchi shoa bue.

²⁵Puhnou kushuyu phaki, khoukayu mai koute-a pi-shiwe, puh hinou kou puletao hai hazholia moyu soua baiwe.

²⁶Puhye zhi peilou süyu khoche ali-a hae; puhye zhi peilou süyu nghou, moa voulou ali-a hae.

²⁷Puhye donou hu sü rouvao büa baie, ae baosahu sü ratayu ssü ali büa baie.

²⁸Puhye huta loure loushu ali-a hae; chuh nou poloua deiyuma rouvao potou alinou khyayu büa baie.

²⁹Puh hisü hu süüpo ali hai rouvao to ali büa baiwe, ae mainou puhye heung nou phyayu sü puhnou konüa baiwe.

³⁰Puhvei pouvu hisü khouchi shoyu lipe zhai büyu khakao bue, kao sütao nou dei naiti sü cho tata phou büa sheapa louwe.

³¹Puhnou dzü hi talou hea peikhaie dzü sü soupa-a baiwe, theadzü khoyu li koyu büa zai dzü sü kopa-a baiwe.

³²Puhnou tayu ludu sasü chatu poa tawe, ae zai dzü hi puhnou lou tapei khaie, zaidzü sü panou laroro pa-a baiwe.

³³Deiphao hi hrikhaona ali-a puhye raiyu hae, puh sü halia pi moyu khaona alie.

³⁴Khaophu soushoyu hrikhaona koute-a puhnou ngaophou moe, soukhaona teitei pei hi veo sü puhnou-e.