Read Poumei Naga JOB 5 Bible Online

JOB 5 - Poumei Naga bible

JOB 5

¹Job, thaonou khepei lousüe khekhaito, zhulai, chila peilou süyu rakivamai thao bue zhulai khe.

²Vamo shoyu nou koa ne lah veaposhu thaiyu sü, tsüdo chemoa voyumai nou soure vah baie.

³Avomai kamai-a khouchia maa tsülouyu Enou ngaoe, ana thalasou puhnou chaa nasü puletao ki hi seive peia baiwe.

⁴Puletao vei nahmaitao hai kaozhou aveih aliro ngaomoe, chikuki hi mai linoua tave lah-a puletaoye vupei moe.

⁵Avomai nou daothouyu cha-mou sü hou-züa laiyu mainou toulou bailai, rai-shu hrohinou paopayu shinamara koute-a toulou baiwe, alia rei-a laimai nou puh vei kini khesü ngaorailai.

⁶Hashi touyu hai dei hinou paopa moe, alia veayu hai deiphi hinou paopa moe.

⁷Cheche vuzüe, mei hinou meipa paopayu büa Emai nou lah rüh hi lou mulouyu büa veayu hai lah nou pfüve lou-a baie.

⁸E hai ne touyu thaio, Ramai hi pah pfürei lou-a avei veayu hai paongaolai.

⁹Puhnou vah adu-dulih souwe, ana süsü Enou süve telou hoe. Puhnou khupa vah souyu sü akhai hae.

¹⁰Puhnou deiphao hi teirü seive pei-a ae dou hi dzü züpeiwe

¹¹Ovai, Ramai nou tai-nou maiye pokupa peie, alia dongai pfülai maiye sousa peie.

¹²Shodo shimai vei dokai sü puhnou souphe pei-a puletao nou souyu vah panou vete loumoyu sou-a baiwe,

¹³Tsüdo veih maiye panou lah puletao vei rüh hi lou mulouyu soupeie.

¹⁴Puletao hai hea teile hinou teizhi soua baiwe, alia hea teile hia kheikou bütou tea mai-a houtawe.

¹⁵Veaholai maiye khouko bumai khoche hinou, puletao vei mü hinou ae puletao vei bah hinou Ramai nou vupa peiwe.

¹⁶Touhalai mai hia areih sü peiwe, ae mai ashimai mü sü puhnou khawu bailai.

¹⁷Zhukhaio, Ramai nou souzü-douzü peiyu maisü rako veie, Ramai nou tukha peiyu jüphiso.

¹⁸Ramai nou zhi zhipeiyu zhimü sü lah puhnou souvei peie, Puh bahnou zhi soupayu nasü lah puh bahnou souvei peilai.

¹⁹Puhnou neye veayu hinou vupapei khai khailai.

²⁰Tokaa veyu phaki puhnou neye panou khütha laimoe, sou-reih teileki-a neye athai hinou vupa peilai.

²¹Ne chi paoshia laimai hinou neye Ramai nou vupeilai, souka-sounghi veyu ki-a puhnou neye vupeilai.

²²Souka-nghiyu alia tokaayu sü nenou konülai, ae deiphao hinou khaosou ye daoyuma pi laimoe.

²³Nenou daotou daosoyu dou sü chuhrao bulai moe, khao-sou alinoua neye hulai moe.

²⁴Süthaisü lah nevei sahpao hinou kaona-a hrülai, nenou nevei zhaotutao ye zhuveyu phaki ali koute-a chemoa hayu soulai moe.

²⁵Nevei tyaomai nahmai sü sühou-pouhou zhou hrülai.

²⁶Chachi koute derai moa meiche-a buyu roube büa nehrü chekhoyu koute hri-a bulai.

²⁷Job, haihai teile dou lou-a checheho chechemoyu zhushowu-a cheche tea süloure, südonou chuo ne-a hai hai eihtea polouo.