Read Poumei Naga JOB 6 Bible Online

JOB 6 - Poumei Naga bible

JOB 6

¹Job nou chila peie, Enou veayu, avei tateitao hai sühcho khao hi thoulou vei-a thou douyu thaio,

³zaidu pehi buyu vünai jünoua süpulai, südonou amü nou paopayu kaomo-zümoyutao sülou-a neletao-a khupa paimoe.

⁴Hali-hala soulousü MAPAO nou Eye loushu nou kashore, ae loushu vei poushi nanou avasou teitei kaive tere, Ramai vei rarou nanou Eye sühao loure.

⁵Reisüh nou toure pou bulukhu rakhaiwu, mokhai-a chode nou toure rouvao bulukhu takhaiwu?

⁶Touvei moyu touso ali hai tai thoumoa khotouwu? Mokhai-a houdzü ka na touveiyu dai buwe?

⁷Taibübüyu touso sü Enou tounüyu hae, alia hataralia toulouyuma E sou-a baiwe.

⁸Daidonou Enou jüpa-a khoyu sü Ramai nou peimowe? Daidonou avei veachi sü keinou peimowe?

⁹Ramai nou jüpa-a Eye southa peilaiyu thaiwo,

¹⁰Puhnou sütou peilai touyu Enou süyu thaiwo, E haizhou koute sou-a buyuma asa-a bailai. Puhnou paoyu hisü Enou hachilia bamoe.

¹¹Enou lah hri-a buloure avei khouko dai bue? E donou koyu ali-a ha-a nou daisounou chukoute panou hri-a buwe?

¹²Eye chuh nou soupei khaitouwu? Mokhai-a avei vasou hai baosahu nou soukhai touvu?

¹³E lah Eye khailu loure khouko hare, Enou soukha kholoure buh ali-a hare.

¹⁴Enou Ramai ye ngaiho ngaimosa, tali souyuma haibüa veayu phaki acheche samai khamai hai koshowe.

¹⁵Ana samai taorai, neletaosü reitu ali büa Eye laluwua baire, Reitu taosü tei rümokhaie thekei tea baiwe.

¹⁶Reitu ye sü vürah nou nulousüe,

¹⁷ana tei soupa khaie dzü keta-a baiwe, süphaki dzükhesü theta khai tea baiwe.

¹⁸Racho pfüa veihao soutayu me-a dzü phouta-a ludu motawe alia sübüa radeiki hinou thai-a baiwe.

¹⁹Sheba alia Tema hi veihao mai nou racho pfüa dzü phoutae,

²⁰ana dzü thekei touyu reitu pe hinou ve puletao vei areih sü hata-a baie.

²¹Neletao sü taibüyu reitu büa baie, daisounou touyuo neletao tave avei veayu ngaolou khaie ngaopi-a le khaitare.

²²E neletao hinou halia peio tea khowu? Mokhai-a neletao Eye donou mai tali hi seihla peio tea paowu?

²³Mokhai-a Eye zhuba ngaobamai bah hinou vupa peio tea paowu?

²⁴Veire sü, avei mah dai-e paopei to, E ngasou bua keilai.

²⁵Neletao nou le sheesha tea paoyu thaisü, E-a aetea poyu dosoe, ana neletao nou paoyu chipao taosü ko loumoyu chi baie.

²⁶Enou paoyu avei chipaosü halia moe, teikhai bai teanou neletao nou chowe, sütou louzü daisou nou veayu dao-a buyu avei chipao khesü chila peikhaiwe?

²⁷Neletaowo pfüpuo hayu rounahtu alia mai qila souyu maiye koute poa neletao rako zhulai, chavei lathaoyu samai khamaiye zhoposhu neletao kini souloure phouwe.

²⁸Eye zhutei toulo, E dayu chi aliro paokhai toulai moe.

²⁹Neletao nou paoyu chitao sü ali-a moe, cheche moyu naye nou cheche souyu thaowuwo, mah-e tea paoyu hai paopu peikhaiso, daisounou touyuo E mah lia soumoe.

³⁰Enou chi paomahyu budou? E avei mah paosheesha louhore tea neletao nou chowu?