Read Poumei Naga JOB 7 Bible Online

JOB 7 - Poumei Naga bible

JOB 7

¹Emai hai deiphao hinou eihtea vah soumowu? Tai-tsü sa-a vah souyu reihmai ali büe.

²Qila mai nou teihao hinou solou nüyu büa; maizho kumainou vahshi ngaolou nü-a khoyu büa

³Eye panou khouh teile taoli hai hamako hinou hrüa bue, alia ahisü kheimathe veayu hai pei-a baie.

⁴Enou zütayu phaki, daisou kinou tei thelaisa tea teithe kho-e, alia khei teilena daizhou sosa tea Esü holorei hailorei-a buwe.

⁵Avei vasou teiteisü shikhao khaitoure, pfüphao teitei sü soukaonou züloure, sou zhimütao hinou ngha küpa-a bue.

⁶Avei teithe taosü areih lia ha-a nou tala ta-a bure, sah daoyu mai lütouyu süü jünoua tha-a nou tawe.

⁷Chokhaio A Ramai, avei hrümai sü ssü haiyu ali bübaie. Avei savayu teile sü akhai soure.

⁸Chu ne Eye ngaowe, ana ngaopu khailai more. Ne kilai Eye nenou phouveyuma, Eye ngaopulai moe.

⁹Teihao nou hatayu thai ngaopu moyu büa mainou thaitayu thai dakhai vepu laimoe, Puhye shikho ngaokho mai-a ngaiwu bailai.

¹⁰Puhnou puh vei ki hi dakhai vepu laimoe, puh vei buh koute noua puhye süpu laimoe.

¹¹Südonou E ngasou bulai moe, Avei rarou lekha alia vamoyu taosü paopalai.

¹²E hai zaidu zaithou hi buyu maitoukhao alie tea chowu? Daisounou Eye kho-a buwe?

¹³E zü-a nou züphao hinou vayu ngaolai mosa, alia azü hinou avei sounou khailai mosa tea cho-a züyu phaki,

¹⁴Zhiho mekou nou ngaopi-pilih mulou-a, ngaopi-pilih zho ngaopei-a E haibüa hria buyu jüwo thaiyu-a veire.

¹⁵E hai ssü hai-a hri-a bujüwo rainoua daothealou nüre.

¹⁶E hri-a bunü more, bungere, E hri-a buyu vanou koyu ali-a hare, Eye panou thai-a baiwo.

¹⁷Daidonou Emai hai neye donou matsü shoyu buge? Emai vah sovei dai donou lenousho-a zhuwe.

¹⁸Nenou puhye teithetsü shona cho-a zhuwe alia teile busasü puh zhai zhuwe.

¹⁹Ne Eye zhuvea peikhailai mowu? pha jütou lia lah Eye panou so-a bulai mowu?

²⁰Oh! Maiye mah-zü zhuyu narai, Enou mah soukhai toua neye daishodou?

²¹Ne Enou mah-a buyuma khaipei laimo vuzüwu? Enou soumah pfümah khaitoua buteiyuma khaipeilai mowu? Thalasou E sü khü hi louta laire, süthai ne Eye phouyuma, Esü hata-a ngaolai moe.