Read Poumei Naga JOB 8 Bible Online

JOB 8 - Poumei Naga bible

JOB 8

¹Süthaisü Shua puona Bildad nou chila peie:

²Ne teile kazhou koute haibüa pao-a bulai? Ne mü hinou paopayu chipaotao sü teikhai hüyu büa baie.

³Ramaiwo acheche naye pothou mah hi khaiwu moe. Acheche hinou soupfüyu hai puh vei zhai baie.

⁴Ne nahmaitao nou Ramai nghoujünou mah souvuzülai, süvanou puletao hi souzü vah sü soubulai.

⁵Ana tsü choda khailou-a Ramai hi kholouo.

⁶Nenou shee-a alia cheche-a buyu thaiwo Ramai nou ve neye soukha peivu zülai, ne kihikha maiye daorai choki savayu büa buu peilai.

⁷Nevei kini hakayu teitei sü poa Ramai nou peipure taosü poda-a zhuyu phaki hatou lia moa bailai.

⁸Daoh tsümai chipao alia hasü nasü licho khaio, Puo-paoh mainou daidai daoe alia dai ngaoe touyu tao-a lichokhaio.

⁹Etao sü dodaoyu nou nalouyu bübaie, halia sümo hie, alia deiphao hi Etao hrümai tousü khungu ali büa baie.

¹⁰Dao tsümai hasü maiye panou neye doupei khaio, puletao nou daitea paokhai toue sütaosü zülo.

¹¹Dzü hayu buh hi doupabe hrülou hoe, puh sü dzüta buh hi deinou buh kukou ngaotu moe.

¹²Dzü theta khaie puhnou rairaikha-a hrüh chemo kinou thaita-a baiwe;

¹³Ramai ye samoyu maitao sü taibüyu doupabe kheihaoe, vuli Ramai ye ngaichezü puletao vei areih ha-a baiwe.

¹⁴Puletao vei lü hai phapo ali mokhai-a kherara vei rapo ali bübaie.

¹⁵Puletao nou phapo ali mokhai-a kherara vei rapo ali hi vülai toulouzü puletaoye pfülou süvu?

¹⁶Maishi mai hai teinai hinou maa keipoa tayu poube kheihao baie, pou nou kipei teitei keihao louyu büa baie.

¹⁷Puletao vei maatao sü chuh phaova koute keihao-a chuh koute phutsü tsülouwe,

¹⁸ana puletaoye paipa laipeikhaio, süthaisü raichoki puletao hai hi paopa-a hrüe touyu mailinoua sülai moe.

¹⁹Maishi mainou savayu sü taibüa baie, puletao thaosü mai kukhe mainou ve thaolou-a bailai.

²⁰Ana Ramai nou hasoukilia acheche maiye sü thaokhai toulai moe, mokhai-a cheche moyu maiye sü Ramai nou soukha peilai moe.

²¹Ramai nou neye sou savapu peilai,

²²ana neye ngaobamai pei hisü Ramai nou hraongu peilai, alia puh vei ki teitei nou hata-a bailai.