Read Poumei Naga JOB 9 Bible Online

JOB 9 - Poumei Naga bible

JOB 9

¹Süthaisü Job nou chila peie:

²Ovai, taitaosü E daoraicho kinou süa bure, ana thaoki thaonah nou Ramai jünou veilou ngalou khailai?

³Thaonou Ramai ye veiva lousüge? Mai linoua chila peilou hoyu chi-o louzü thethe noulou süe.

⁴Ramai hai tsüdo veih shoe alia khouko bushoe, Mai linoua puh nghoujünou la-a dulou hoe.

⁵Paosü khaimoa deichi taoye dailü lousüe, alia puh vei lekha rarou nou puletaoye souha lousüe.

⁶Ramai nou nüsüyu seive dei teitei hou lüloue. Deiye pfüyu dekataoye ngulü peie.

⁷Puhnou teinghi ye panou pamoa ngilou süe, alia teivu taoye panou valai moe tea ngilou süe.

⁸Ratei souyu hi-e mai linoua puhye soukha moe, alia zaidu hi maitoukhao naye nükhao louyu hi maili soukha-a loumoe.

⁹Puhnou teizühko vutao, teithevu, khopfükilou maitao ae teibeko vututao sü soupeie.

¹⁰Etao nou süvete louho, phousha louhoyu khupa tyatyalih soupeie.

¹¹Puh sü ahinou nghitei tea bue, ana Enou puhye ngaowu moe.

¹²Puhnou polounü polouyuma mai linoua khulou hoe, ne dai souwe touyu koute-a mai linoua noupie.

¹³Ramai vei rarou sü khaitayu hae, Zaidu hi buyu Rahab maitou khaoye soukhamai koute-a nakou puhye khurü-a baiwe.

¹⁴Sütouyu thaisü E kabüa puhye züvalou khailai? E daikinou popa puhye chi veivalou khailai?

¹⁵E mah hayuma puhye chila peilou hoe Zhuvea peio tea chiku-apeio hinou khore likhei baie.

¹⁶Enou puhye ku-a puhnou ae-ao tea vepei she toukhai-a Enou paoyu chi sü puhnou kei-nou peishulai touyu E louche louhoe.

¹⁷Puhnou teikhai teirü shishoyu nou seive halia moa Eye souvea shopeie.

¹⁸Puhnou Eye panou ssü hailou hore, Puhnou ahrü mamai sü souposhu khatao peie.

¹⁹Khouko nou valai tou-a puh sü khouchi sholoure, Mah-zü phoulai tea-a thaonou puhye kusave peilou süe?

²⁰Lah avei mah ali-a hae, ana sütea paoyuma hamako baie. E hrüa bupunü more.

²¹E mah ali-a hae, ana E hria bupunü more, mahyu mai-a mahmoyu mai-a Ramai nou raibütou-a souha khaitou bailai.

²³Mahmo hayumai nou thaita khaie, Puhnou konü-a baiwe.

²⁴Ramai nou deiphao sü ashimai bah hi peiwure. Puhnou chiku peiyu mai hrülai nghithou sü souchawure. Haihai Ramai nou soumolouzü thaonou soukhailai?

²⁵Teitheli koute-a kaonayu ngaokhai moa ahrü mamai sü tapoa lata-a bure.

²⁶Ahrü mamai sü tala tawe, tavei shoyu lüche ali nou thasho-a zhaokou zhaoye nüre bütoua zhaotare.

²⁷Enou veahoyu ngaiwua vamoyu chi paopu moa apah va-a bailaire toukhaie,

²⁸ahi sou-nou vepulou-a Eye souveapua baire, haihai daidonoue touyuo Eye hai mah hae tea Ramai nou popei more.

²⁹E hai mah souyu mai alie tea popeiyu thaisü E hamako nou daisounou terou-a bulai?

³⁰Phoulya (sabou) nou avei mah sü khüshee louhoe.

³¹Ramai nou Eye sheemoyu kaobvü hi laithou peiwure, Lah Enou banou buyu sabanü koute-a Eye ngaorare.

³²Ramai hai deiphao maishe touyuo E-a puhye chila peilou süe, chiku ki hinoua ve mah-zü kushee lousüe.

³³Ana ahai kohi tapeire mai ali-a hare, Ramai ahai chiku peire mai ali-a hare.

³⁴Eye souveayu khaisou pei-a baio, Ramai! Eye pirayu thaopei baiwo.

³⁵Sütoulouzü E-a puhye pimoa chi paolai, E hai thaoge touyu lah Eye süwe.