Read Poumei Naga LOUTAO 10 Bible Online

LOUTAO 10 - Poumei Naga bible

LOUTAO 10

¹Oh MAPAOwo, ne daidonou hoshoa nou buwe? Etao nou veaho-a buyu phaki ne daisounou tutsü louwe?

²Mai ashimai nou khaophu soua touhayu maiye souvea-a bure; puletao nou soukhai tiyu sho-rü hisü lah puletaoye panou mulou theo.

³Mai ashimai nou lah puletao vei jüpa hinou le dusho loure; puletao hai dutounüyu nasü veiwe tiloua MAPAO ye sü paoshiwe.

⁴Mai ashi mainou khaophu zhai souloua MAPAO ye sü ngaophou more; puletao vei tsüle hisü Ramai touyu ali-a hare.

⁵Mai ashimai nou soupfüyu vah veishi sü veilouwe. Puletao nou Ramai vei chikuyu sü zhingao moe; puletaoye ngaobayu maitaoye sü puletao nou jünüa baiwe.

⁶Puletao hai lah nou lah hi haibüa paoe, “Etao hai kaodu takhai toulai moe; Etao hai veahoyu daokhai toulai moe.”

⁷Puletao vei mü hisü chaayu, dayu ae pirayu nou phoua bue; puletao hai chi ashi ae kaomoyu chi-la paoyu hai thashoe.

⁸Puletao hai nuh kinou tutsüa bue, ae mah hayu maiye southare donou dapoa nou bue. Puletao hai lelou hoyu maiye kheikhei soua chohpoa nou bue;

⁹khaosouveo büa puletao nou tutsüa buyu buh hinou kho-a bubaiwe. lelou hoyu maiye nüloure donou dapoa nou bue; puletao nou lelou hoyu maiye sü puletao vei rüh hinou muloua sapoa ta-a baiwe.

¹⁰Veahoyu maiye sü dakhaowure, puletao hai kaotare; puletao hai puhvei khouko khevai loure.

¹¹Mai ashi maitao nou haibüa lah puletao hi paoe, “Ramai nou ngaiwure! Puhvei nghithou sü mailoure ae Eye ngaolou hore!”

¹²Oh MAPAOwo, maishi maitaoye sü tudee peio! Veahoyu maiye sü licho peio!

¹³Daidonou maishi mainou Ramai ye paoshiwe, ae puletao nou haibüa paoe, “Puhnou Eye souvea laimoe?”

¹⁴Ana nenou ngaowe, lelouho mai nou veayu ae sounou souyu sü nenou zhua nou bue ae teile busasü soukha peire donou bue. Lelou hoyu mainou puletao vei hrümamai sü ne bah hi thaothou peiwure; nenou teisa nou veaho laimaiye soukha peie.

¹⁵Mai ashi mai ae hashi souyu maivei khouko sü souha peio; puletao nou vah shi soukhai touyu donou tudee peio; puletao nou vah ashi khesü bailoumo koute tudee peio.

¹⁶MAPAO sü akhai ha-a teisa nou veo sü soulai. Rah kukheye thoyu maitao hai puhvei teidei hinou hata-a bailai.

¹⁷Oh MAPAOwo, lelou hoyu maivei veachi sü nenou keinou peilai; nenou puletao vei tsüle sü soudu peilai.

¹⁸Veaho laimai ae rounahtou vei krayu pai sü nenou kei peilai; nenou puletao vei jüpa hinou chiku peilai, sübüa deiphao maiye panou puletaoye sü soupipu laimoe.