Read Poumei Naga LOUTAO 102 Bible Online

LOUTAO 102 - Poumei Naga bible

LOUTAO 102

¹Oh MAPAOwo, Enou veachi paoyu sü keipeio, Enou kra-a soukha khoyu nasü nou peio!

²Enou veahoyu phaki, ahinou tavai tapeiso! Nevei noubei sü ahi pfürei peio! Ae Enou neye kuyu phaki Eye thashoa nou chila peio!

³Avei hrü hai meikhao büa hata-a bure; avei pfüphao sü mei taoyu büa tao-a bure.

⁴Eye sü poube ali büa phailaiwure, ae kivü tare; E hai haliro tounüyu hare.

⁵Ewo shusoua le-a bubaire, avei pfüphao hai hee ae rao likhei bua baire.

⁶Ewo radeiki hinou raohou ali bütoua bubaire, ae mainou thaokhai touyu buh ali hinou tuturou bütoua bua baire.

⁷Ewo zhiholou hore; lah likhei kipeitaoh hinou buyu raohou ali büre.

⁸Teithetsü Eye ngaobayu maitao nou Eye sü haongu soupeia bure, ae Eye konüa buyu maitao nou avei zhih nou poa chaawe.

⁹Nenou lekha rarouyu donou, vounai nou avei touso sou baire, ae avei nghidzü sünou Esü ke-a bubaire. Nenou Eye sü polaloua shilai peiwure.

¹¹Avei hrütou hai-o koukhe teikhu büa baire, kitayu pounghou ali büa baire.

¹²Ana MAPAO, newo louzü teisa nou veo sü soulai, vere khaphao teitei nou neye sü licholai.

¹³Ne tashuloua Zion ye zhuvea peio, puhye zhuvea leshi peire teile sü vere, chu hai kaotouyu teilere.

¹⁴Nevei kilai maitao nou puhye sü leshiwe, puh hai soushi khaitouyuma; puhye sü soushiwua thaokhai-a tayuma puletao nou honapaiye sü zhuveawe.

¹⁵Tyahrü veishi nou MAPAO ye sü ngaopi-e, deiphao hi veo mai hrülai nou puhvei khouko nasü ngaopiwe.

¹⁶MAPAO nou Zion ye soushu dakhai peiyu phaki, puhnou puhvei aduso nasü pongao peilai.

¹⁷Puhnou thaolai khaiyu puhvei maitao vei veachi paoyu sü puhnou keinou peilai.

¹⁸MAPAO nou soupei khaitouyu vah haso khesü vere bonakhaye donou rüdai khaipeio, sükulouzü chuchu nakou moa buyu maitao-a puhye sü paosholai.

¹⁹MAPAO nou puhvei sheeyu buh hinou zhukouwe, puhnou raki vanou deiphao hisü zhukoua nou bue.

²⁰Hukhaki hinou lüa buyu maitao pai sü puhnou chouwe, ae southalaio tya chikude khaitouyu maitaoye sü puhnou lahdo soupeie.

²¹Südonou puhvei zhih sü Zion hinou shapaolai, ae puhye sü Jerusalem hinou paosholai,

²²ae tyahrütao ae vedei khenou koa tave MAPAO ye thoyu phaki, puhye sü paosholai.

²³E nahle-a bukinou MAPAO nou Eye sü southou lülou hoa khaipeiwure, puhnou avei hrümamai sü soujü peire.

²⁴Oh Ramai, E tsülou mojüo Eye pota peiso. Oh MAPAOwo, newo louzü teisa nou bukou telai;

²⁵Nenou teideiphao sü daohdao nou soupeiwure, ae ne bah vuzünou raki sü soupeie.

²⁶Sütao veishi nou hata-a bailai, ana newo louzü teisa nou bulai; sütao teitei hai sabanü büa shita-a bailai, ae sütao hai hata-a bailai.

²⁷Ana newo louzü teisa nou raibüa bubaie, ae akhai ha-a nou ne louzü hrülai.

²⁸Etao vei nahmaitao hai kaozhou veia hrülai, ae nevei khopeiyu khe hinou puhtao vei tyaosholea maitao hai zhoukao ashi daomoa hrülai.