Read Poumei Naga LOUTAO 116 Bible Online

LOUTAO 116 - Poumei Naga bible

LOUTAO 116

¹Enou MAPAO ye sü leshi-e, daiolouzü puhnou avei pai sü kei peie; puhnou avei veachi sü keinou peie.

²Enou puhye kuyu chüsü, puhnou apai sü keinou peie.

³Athai hi loutare kaozhou ashi sünanou Eye sühao loure, khüh hi tare ngaopiyu nasü ahi nghitei loure, Esü ngaopi-a nou dopfüa bua baire.

⁴Süthaisü Enou MAPAO ye sü haibüa kue, “Enou ne hinou ra-a nou khowe, Oh MAPAOwo, Eye khailupa peio!”

⁵MAPAO hai zhuvea peisüh shoe ae veishoe; Etao Ramai hai maiye leshi sühsho-e.

⁶MAPAO nou lülou hoyu maiye vupa peie; Enou kaozhou shi-a buyu phaki, puhnou Eye khailupa peie.

⁷Oh arako, tsüle soutou toulo, daiolouzü MAPAO nou ahi veisho peikhai toue.

⁸MAPAO nou Eye thaire hinou khailupa peie; puhnou anghidzü southe peie ae Eye panou hraongu hinou povailai peie.

⁹Südonou chuo Enou MAPAO vei nghoujü nou, hriyu maivei teidei hinou talai.

¹⁰Enou haibüa pao-a buyuma puhye louchelai, “Eye soushi sasaloua khaipeiwe,”

¹¹ae Enou ngaopi shopoa nou haibüa paoyuma “Mai ali koute-a louche lou hore,” puhye likhei louche-a bua bailai.

¹²MAPAO nou ahi veisho peikhai toue, südonou Enou puhye dainou peilaige?

¹³Enou khailupa peiyu pai nasü poa lashu peilai, ae MAPAO zhih sü kulai.

¹⁴Puhvei maitao nou vejüa buyu buh hinou Enou apaokhai touyu khesü puh hi pove peilai.

¹⁵MAPAO vei nghoujü hinou muh teishoyu hai puhye loucheyu mai ali nou thaitayu nasüe.

¹⁶Oh MAPAOwo, E hai nevei kilai baie; apfü nou souyu büa Enou nevei kuvah sü soulai. E thaire hinou nenou Eye khailupa peie.

¹⁷Enou neye kaloyu vei posheela nasü pove peilai, ae MAPAO vei zhih sü kulai.

¹⁸Nevei maitao nou tave jüa buyu buh hinou, nevei sheeyu Rathoki buyu Jerusalem hinou Enou apaokhai touyu khesü ne hi pove peilai. MAPAO ye paosholo!