Read Poumei Naga LOUTAO 118 Bible Online

LOUTAO 118 - Poumei Naga bible

LOUTAO 118

¹MAPAO ye kalo paopei khaio, daiolouzü puh hai veisho-e, ae puhvei leshi hai akhai ha-e.

²Israel maitaoye panou haibüa paolo, “Puhvei leshiyu hai akhai ha-e.”

³Ramai vei napao maitaoye panou haibüa paokhaio, “Puhvei leshiyu hai akhai hae.”

⁴Puhye thoyu mai hrülaiye panou haibüa paolo, “Puhvei leshiyu hai akhai hae.”

⁵E veahoa buyu phaki, Enou MAPAO ye ku-e; puhnou Eye chila peie ae Eye lahdo soupeie.

⁶MAPAO nou Eye koa bupeiwe, Enou hataralia ngaopi laimoe, thaonou Eye souloure sü bue?

⁷MAPAO nou Eye sü soukha peiwe, südonou Eye ngaobayu maitao nou hakatayu sü Enou ngaolai.

⁸Maiye loucheyu jünou MAPAO ye loucheyu na-a veipu hie.

⁹Süthai-apei maitaoye loucheyu jüo MAPAO ye loucheyu-a veipu hie.

¹⁰Ngaobayu maitaoli nou Eye sü sühao loure, ana Enou puletaoye MAPAO vei khouko sünou souha peiwure.

¹¹Puletao nou Eye sü sühao loure; ana Enou puletaoye sü MAPAO vei khouko sünou souha khaiwure.

¹²Puletao nou Eye sü laivoutu büa zhaoh sühao loure; ana puletaoye sü poube shube khenou mei taopa peikhaie thashoa nou deihayu büa MAPAO vei khouko sünou Enou puletaoye sü souhawure.

¹³Eye sü puletao nou soutaosoua nou due, ae Esü kaodu tare, ana MAPAO nou Eye soukha peie.

¹⁴MAPAO nou Eye soukhouchi peie; puhnou Eye khailupa peie.

¹⁵Ramai vei maitao nou sashoa nou puletao vei sahpao hinou veilouyu vei shura soua shayu paisü kei khaio: “MAPAO vei khouko sünou haisü soupeie!

¹⁶Puhvei khouko sünou soureih sü soupeie, ae Etaoye veilouyu nasü pove peie!”

¹⁷E hai thailai more, hria bulaire, ae MAPAO nou soupeikhai touyu vah haso khesü shapaolai.

¹⁸Puhnou Eye shisho-a nou tudee peie, ana puhnou Eye panou thai moe.

¹⁹Rathoki vei kikhu sü Eye houthou peio, Enou talou loua nou MAPAO ye sü kalo paopeilai!

²⁰Hai nasü MAPAO vei kikhubomü-e; checheyu mai likhei taloua bailai.

²¹Oh MAPAOwo, Enou neye paoshowe, daiolouzü nenou avei veachi nasü keipeie, nenou Eye veilouyu nasü peie.

²²Ki souyu mainou veimoe tea polaiyu chuh nasü matsü kayu chuh ali souloure.

²³Hai sü MAPAO nou soupeiyu vah haso-e; haisü zhuposhu khupa shore!

²⁴Zhou hai MAPAO nou veilouyu teithe-e; Eletao nou asa-a khonüh nülai khe!

²⁵Etaoye khailu peio, MAPAOwo, Etaoye khailupa peio! Oh MAPAOwo, Etaoye veilouyu sü peio!

²⁶MAPAO vei zhih hinou taveyu maiye sü Ramai panou hapeiyu sü soulo! MAPAO vei Rathoki hinou neletaoye sü Etao nou shiha peiwe.

²⁷MAPAO hai Ramai-e, puhnou Etao hi veih sho-e. Neletao bah hinou süübo khesü poloua khonüh nüre donou posheelabu nasü tasühao khaio!

²⁸Ne hai avei Ramai-e, ae Enou neye kalo paopeilai; Enou nevei aduso nasü shapao peilai.

²⁹MAPAO hi kalo paopei khaio, daiolouzü puh hai veisho-e, ae puhvei leshiyu hai akhai ha-e.