Read Poumei Naga LOUTAO 144 Bible Online

LOUTAO 144 - Poumei Naga bible

LOUTAO 144

¹Eye vupa-apeio MAPAO ye sü paosholo! Puhnou Eye kabüa soureih soulai touyu dokai khesü doupeie.

²Puh hai Eye kho-apeio chuhdu nasüe, alia avei baibu ae Eye khailupa peipue, puhnou Eye pa kaozhou ashi daokhailai moe touyu Enou puhye louchewe. Puhnou tyahrütao hai avei khakhe hi pothou peie.

³Oh MAPAOwo, nenou süngao-a buyu Emaitou hai daige? Thai-a bailaiyu hazhoti lia moyu maiye donou ne daitea tsü chowe?

⁴Puh hai teikhai hüphou tayu büa baie; puhnou bure teile hai teihao ali büa ta-a baiwe.

⁵Oh MAPAOwo, ratei sü paipha loua takou peikhaio, deichi khesü kou deipei khaio, sükulouzü sütao hai meikhao pa-a bailai.

⁶Tei peivavayu nasü seive peio, sükulouzü neye ngaobayu maitao hai tupo rarou ta-a bailai.

⁷Kushoyu buh hinou ne bah thaikou Eye zai thoushoyu hinou paipa peio ae khailupa peio, Eye vakou maivei khouko hinou khailupa peio,

⁸puletao hai acheche chi paokhai toumoe, ae chaachou soukhai touyuma dakhokho-a baiwe.

⁹Oh Ramai, Ewo neye lou ashu nou sousholai; Enou shapoulei ae lanabvü poa neye lou sousholai.

¹⁰Nenou veo maitaoye soureih veilouyu sü peie, ae nevei kilai David ye vupa peie.

¹¹Zhaipou shishoyu ngaoba maitao hinou Eye khailupa peio, vakou mai bah hinou Eye vupa peio, puletao hai checheyu chi paokhai timoe, ae chaachou soukhai touyuma da-a baiwe.

¹²Etao vei nahpoutu maitao hai nahle-a buyu phaki, panou khouchi sho-a buyu süübe ali büa bupeio. Etao nahnaotu maitao hai veo vei ki hi zhainga veihsho-a soukhai touyu deka ali büa panou maiye thainüa bupeio.

¹³Etao vei thoubao khesü panou thou tyatyali nou phoutao-a bupeio. Etao vei teidei hi kikhaorü khesü panou tyakaa nou phoutao-a hrüyu sü soupeio.

¹⁴Etao vei kikhaorü khesü panou tyoutu touthayu sü soumoa alaolao toupeiyu sü soupeio. Etao vei teidei hisü panou veaho-a choroyu sü soupeiso.

¹⁵Haibüa ha ngaoyu mai hai savayu maitao-e; MAPAO ye panou puletao vei Ramai soulouyu maitao hai savayu maitao-e.