Read Poumei Naga LOUTAO 18 Bible Online

LOUTAO 18 - Poumei Naga bible

LOUTAO 18

¹Oh MAPAOwo, Enou neye leshie! Ne hai Eye vupa apeio nasüe.

²MAPAO hai avei chuhdu ae reihkhaobu nasüe. Avei Ramai nou Eye kho peiwe, ae puh hinou Esü bailouwe. Puh hai avei rü-e ae Eye vupeia panou kaozhou veia bubaiwe.

³Enou MAPAO ye kuyu phaki, Eye ngaobayu maitao bah hinou puhnou Eye khailupa peie. MAPAO ye paosholo!

⁴Kaozhou shi-a thailou veiyu sünou Eye sühao loure, ae soukanghei peiyu sünou dzüdu büa ahisü veloure.

⁵Kaozhou ashi ae athai sünou Eye sühao loure, ae khü hi loure vei sho-rü sünou Eye sühaokhai loure.

⁶Enou veaho-a buyu phaki, MAPAO ye sü Enou ku-e; Enou avei Ramai hi Eye soukha peio tea kho-e. Puh vei rathoki hinou avei pai sü puhnou süloure; soukha peio tea Enou kra-a paoyu sü puhnou kei peie.

⁷Süthaisü deiphao hai ngua nou lüre, deichi vei beimaa hai lüa ngure, daiolouzü Ramai nou lekha loure,

⁸Puhvei nghou qulu hinou meikhao sü khaopare, ae puhvei mü hinou meikei ae meithou sü keipare.

⁹Puhnou ratei sü soukho khaiwure ae puh phi khevai sü zhitei touyu teihao nou koulou loure.

¹⁰Puhnou shouh pfüyu khaona phao hinou tavei shopoa nou zhaotawe, puhnou teikhai vei shouh hinou zhaopoa tawe.

¹¹Puhnou lah puhye sü azhi nou holoure, puhye sü teihao ae dzü nou sühao poa nou bue.

¹²Puh nghoujü hinou buyu teirei vavayu hisünou payu reithou ae mei ava nou zhitei-a buyu teihao khesü souha laire.

¹³Süthaisü MAPAO nou ratei hisü nou pa teisü pare, ae Kukulai hi Bupu pai sü panou choue.

¹⁴Puhvei voulouthou sünou kapa puhye ngaobayu maitaoye sü soupho rarou laiwure, teipei vavayu nasü nou pa puhnou puletaoye sü tutare.

¹⁵Oh MAPAOwo, nenou neye ngaobayu maitaoye züpeiyu phaki, ae nevei lekha rarou sünou puletao hi rayu phaki, zaidu dzü nou hopfüa buyu dei sü zhingaoe, ae deiphao vei beikhei sü halinou-a hokhai more.

¹⁶MAPAO nou ratei hinou takou Eye poloue, ae Eye puhnou zai thoushoyu buh hinou popa peie.

¹⁷Puhnou Eye ngaoba shoa buyu maitao, ae Eye ngaora shoa buyu maitao bah hinou vupa peie, daiolouzü puletao hai Eye donou khousho loure.

¹⁸E veahoa buyu teile hinou puletao nou Eye due, ana MAPAO nou Eye vupa peie.

¹⁹E kaozhou shia buyu phaki puhnou Eye soukha peie; puhnou Eye khailupa peie, daiolouzü puhnou Eye jüpa-e.

²⁰MAPAO nou Eye kaozü thaifüa buu peie, Enou chilee checheyu thaifüa puhnou Eye shiha peie.

²¹Enou MAPAO vei chikha sü züwe, ae Enou Ramai hisü nou tarei tamoe.

²²Puhvei chikha veishi sü Enou züloure, ae puhvei kharochi khesü Enou züba moe.

²³E mah ali-a hai-e touyu puhnou süwe, ae kaomoyu vah haso aliro Enou soumoe.

²⁴Südonou MAPAO nou Eye kaozü soua hrüyu donou ae chilee cheheyu donou shiha peie.

²⁵Oh MAPAOwo, nenou chilee checheyu mai hisü chilee cheche peie; mai aveih mai hisü nenou mai veisho peie.

²⁶Sheeyu mai hisü nenou sheesha-a ngaopeie, ana mai ashimai hisü nevei zhaipou ashi nasü soungao peie.

²⁷Nenou tainou soua laiyu maiye sü khailupa peie, ana khaophu souyu maiye sü ponakou peie.

²⁸Oh MAPAOwo, nenou avei meivabvü nasü taopeie; ahi zhi-a buyu nasü nenou souva peie.

²⁹Eye ngaobayu maitaoye duloure khouko sü nenou ahi peie, ae puletao nou kivo khokhai touyu khesü zhaocho lousüyu khouko sü ahi peie.

³⁰Ramai vei vah haso hai veichekho toua baie! MAPAO vei chipao hai cheche-e! Puhye louche-a phouyu mai hrülai hisü puhnou rü ali büa vupeiwe.

³¹MAPAO likhei Ramai sü baie, Etaoye vupeire hai Ramai baimoa kukhe mai thao bue?

³²Ramai nou Eye soukhou soutsü peie, ae avei ludu veishi sü kaozhou veia panou taloue.

³³Puhnou Eye shu büa tavei shoyu phi soupei khaitoue, ae deichitao hia Eye panou kaozhou veia buloue.

³⁴Puhnou Eye soureih soure do khesü doupeie, sübüa Eye panou chikayu voulou koute-a poa kalou süyu sü soupeie.

³⁵Oh MAPAOwo, nenou Eye vupeie ae khailupa peie, nevei leshi zhuvea vanou Esü duso-a baie, ae nevei khouko vanou Esü kaozhou veia baie.

³⁶Ngaoba maivei bah hi loure hinou nenou Eye poku povai peie, ae Eye panou kaodu takhai toumoe.

³⁷Eye ngaobayu maitaoye panou thaihu poho puletaoye nüloue, puletaoye souha khaimo koute panou souha loue.

³⁸Enou puletaoye dakhao peie, ae puletao hai kushupu laimoe, puletao hai anghoujü nou hraongu ngaore.

³⁹Nenou Eye soureih soulou süyu khouko sü peie, ae Eye ngaobayu maitao jünou ngalouyu peie.

⁴⁰Eye ngaobayu maitao hai nenou pa ahinou tutare, Eye ngaorayu maitaoye sü Enou souha peiwure.

⁴¹Soukha peio tea puletao nou kra-a khowe, ana puletaoye sü maili noua vupa peimore; puletao nou MAPAO ye ku-e, ana puhnou puletao vei khoyu nasü keipei more.

⁴²Enou puletaoye sü naihü büa sousasa khaipeiwua puletaoye sü panou teikhai nou hüpoa tare. Enou puletaoye sü ludu hi buyu nai büa deijüjü peie.

⁴³Eye ngaophou moa khaityayu maitao hisü nou nenou Eye khailupa peie, ae Eye panou tyahrütao pei hinou pa peikhowo nasü soupeie. Enou sümo ngaomoyu maitaoye panou chuo avei kuvah souyu mai soure.

⁴⁴Vakou mainou chuo Eye khurüa bure, Enou kharochi peiyu phaki, puletao nou achi sü züre.

⁴⁵Shetu maitao hai khuveiyu sü hare, ae puletao nou veihsho-a soukhai touyu reihkhaobu kinou ngaopi shopoa vakou tupare.

⁴⁶MAPAO hai hriwe! Eye vupa-apeio ye sü paosholo! Eye khailupa peiyu Ramai vei aduso nasü shapao peikhaio.

⁴⁷Eye ngaobayu maitao jünou veilouyu nasü puhnou Eye peie, tyahrütaoye sü avei khakhe hi polou khaipeie.

⁴⁸ae Eye ngaoba-a buyu maitao hinou Eye khailupa peie. Oh MAPAOwo, nenou Eye ngaobayu maitao jünou veilouyu nasü peie, ae zhaipou ashi maitao hinou Eye vupa peie.

⁴⁹Südonou Enou neye tyahrütao nghoujünou paoshowe; Enou neye lou soushowe.

⁵⁰Ramai nou puhvei veo hisü dusho-a veilouyu nasü peie; puhnou dokupa louyu mai hisü tobai soumoa leshiyu nasü ngaopeie, David ae puhvei tyaosholea hrülai hisü akhai hayu zhuvea leshi nasü peie.