Read Poumei Naga LOUTAO 25 Bible Online

LOUTAO 25 - Poumei Naga bible

LOUTAO 25

¹Oh MAPAOwo, ne hi Enou veachi paowe:

²Oh avei Ramai, Enou neye louchewe. Eye panou hraongu ngaoso, ae Eye ngaobayu maitaoye panou ajünou ngalouso.

³Neye louche-a ne vuzhia buyu maitaoye panou hraongu ngaoso, ana neye khaitya-a duyu maiye sü panou hraongu ngaotheo.

⁴Oh MAPAOwo, nevei ludu khesü Eye ngaopeio, ae sütao hai Eye doupeio.

⁵Nevei acheche na thaifüa Eye panou hrüloure donou doupeio, daiolouzü ne hai Eye khailupa peiyu avei Ramai-e. Enou neye teisa nou louche-a bue.

⁶Oh MAPAOwo, nevei zhuvea ae tobai soumoa leshi peiyu nasü licho peio. daiolouzü hainasü raichoki nou nenou soungao peikhaitoue.

⁷Enou nahle-a buki soumah pfümah khaitouyu mahmo khesü khaipeio. Nevei tobai soumoa leshi peiyu ae zhuvea peiyu nasünou Eye licho peio, Oh MAPAOwo!

⁸MAPAO hai cheche-e ae veisho-e, südonou puhnou mah maiye ludu daiki nou talai touyu hai doupeiwe.

⁹Puhnou tainoutou soua laiyu maikheye sü acheche ludu hi süthai sa-a tapeie, ae puletao hi puhvei leli nasü doupeie.

¹⁰Acheche hinou ae leshiyu hinou puhnou puhvei chikha ae kharochi züa buyu maitaoye sü süthaisa-a tapeiwe.

¹¹Oh MAPAOwo, nenou apaopei khaitouyu thaifüa avei mahmo khesü khaipeio, daiolouzü amah hai pousho-a buloure.

¹²MAPAO ye tsükhoua buyu maitao hai puh hinou puletao nou tare ludu nasü douloulai.

¹³Puletao hai teisa nou sava-a nou hrüloulai, ae puletao vei nahmaitao nou teidei nasü poloulai.

¹⁴MAPAO hai puhvei chi züa buyu maitao vei samai khamai-e, ae puhnou koa vo soukhai touyu nasü puletao hi süngao peie.

¹⁵Enou MAPAO vei soukha peiyu nasü teisa nou vurei-a nou bue, ae puhnou Eye kaozhou ashi hinou vupa peie.

¹⁶MAPAOwo, ahi reidakhai vepeio, ae Eye zhuvea peio, daiolouzü E hai lah likhei baire ae lülou hore.

¹⁷Enou levea buyu hisünou Eye sousava peio, ae Eye veahoyu hinou khailupa peio.

¹⁸Enou veaho-a buyu ae sounou-a buyu nasü licho peio, ae amah veishi sü khaipeio.

¹⁹Zhukhaio, Eye ngaobayu maitao sü kazhou bue; puletao nou Eye daizhou koute ngaora-a bue.

²⁰Eye vupeio ae khailupa peio, Eye panou hraongu daopeiso, E ne hinou baisho loure donou vewe.

²¹Avei veiyu ae ale sheeyu nasü nou Eye poku povai peio, daiolouzü Enou neye louchewe.

²²Oh MAPAOwo, puletao nou veahoyu teitei hinou, nevei Israel maitaoye sü khailupa peio.