Read Poumei Naga LOUTAO 31 Bible Online

LOUTAO 31 - Poumei Naga bible

LOUTAO 31

¹MAPAOwo, E ne hinou ve bailoulai tea vewe, Eye panou hraoyu ngaoso. Ne hai checheyu Ramai-e, Eye khailupa peio tea ne hi veachi paowe.

²Achi kei peio! Eye chunou khailupa peio! Nenou Eye panou bailoure chudu nasü soupeio, Eye khailupa peire kaopo nasü soupeio.

³Ne hai avei baibue, ae Eye vupa apeio nasüe, nenou paokhai touyu thaifüa Eye khopeio ae Eye süthaisa-a tapeio.

⁴Eye muloulai tea shorü southou khaitouyu hinou porei povai laipeio, kaozhou ashi daore hinou Eye panou ne hinou bailo.

⁵Ne bah hi avei hrümai sü thaothou peiwe. Oh MAPAOwo, ne sü louchelou veiyu Ramai-e, nenou Eye khailupa peio.

⁶Nenou cheche moyu rataoye thoyu maiye sü ngaora-e, ana Enou MAPAOwo, neye louchewe.

⁷Nenou tobai soumoa Eye leshi peiyu donou Enou savasho-a nou bulai, daiolouzü nenou avei sou-nouyu khesü ngaoloure, ae Enou veahoyu khesü nenou süloure.

⁸Nenou Eye sü ngaobayu maitaoye panou nülou moe, Eye lahdo soua panou tanüyu buh hisü taloue.

⁹Oh MAPAOwo, Eye zhuvea peio, daiolouzü E veaho sho-a nou bure; dopfüa kra koute-a buyu donou anghithou sü ha ngaomo tare, avei pfüphao hai-a shichekho tare.

¹⁰Esü veahoyu khaikho dao-a bubaire, dopfüa krayu donou avei hrümai sü soujü laiwure. Veahoyu donou Esü lülou hore, avei rao koute-a shitare.

¹¹Eye ngaobayu mai hrülai nou, ae avei kinapa mai koute-a Eye sü ngaophou moa konüa bubaire, Eye sükho ngaokhoyu maitao koute-a Eye ngaopi loure, puletao nou Eye ludu hinou ngaoyu phaki, puletao hai ahi nou tutare.

¹²Athai mai ali büa Eye sü mai hrülai nou ngaiwure, na ali poa khilaiyu büa Eye sü khilai khaiwure.

¹³Eye ngaobayu maitaoli nou kheikhei sou-a chi phayu Enou chou-e, pi-hiyu sünou Eye sühao-a buloure. Puletao nou Eye ngaobayu hinou soushilai tea tsücho da-a buloure, ae Eye southare donou shodo ashi sü souda-a nou buloure.

¹⁴Ana Enou neye louchewe, Oh MAPAOwo; ne sü avei Ramai-e.

¹⁵Avei teile ae hrümai sü ne bah hi bua baie, Eye ngaobayu maitao ae souveayu maitao hinou Eye khailupa peio.

¹⁶Nevei kilai Eye sü zhuvea leshi hinou zhupeio, nevei tobai soumoa leshi peiyu nanou Eye khailupa peio.

¹⁷Oh MAPAOwo, E neye kua nou bue; Eye panou hraongu daoso. mai ashi maitaoye panou hraongu ngaotheo, ae puletaoye panou athai maivei teidei hisü raokhai toumoa ta-o.

¹⁸Dayu mütai khesü panou ngasoua buwo, daiolouzü puletao nou khaophu soua ae zhotu soua acheche maiye paoshiwe.

¹⁹Nevei aveih na khesü daizhou koute khupa-e, nenou sükhesü neye tsükhoua buyu maitaoye donou khaida peiwe. Ne daizhou koute veiwe touyu sü mai hrülai nou süwe, ae neye louche-a buyu maitaoye nenou vupa peiwe.

²⁰Mainou soushilai tea buyuma, nenou puletaoye sü ne nghoujü nou poku povai khaipeiwe, nevei baibuh hinou puletaoye sü nenou ngaoba maitao nou ngaophou moa chi lashi paore hinou poku khaipeie.

²¹MAPAO ye paosholo! Daiolouzü Eye mainou sühao loua taidalai tea buyu phaki puhnou puhvei leshi nasü khupa soua Eye ngaopeie.

²²Puhvei nghoujü hinou Eye huta phare tea E sü ngaopi sho-a nou tsücho-e. Ana Enou kra-a soukha peio tea khoyu phaki puhnou avei pai sü keinou peie.

²³MAPAO ye louche-a buyu mai hrülai, puhye leshilo. Puhye louche-a buyu maitao sü MAPAO nou vupa peiwe, ana khaophu soua buyu maiye sü puletao nou ngaozüa buyu na thaifüa tudee peiwe.

²⁴MAPAO vei vu kho-a buyu mai hrülai, khouchilo, ae khuveilo.