Read Poumei Naga LOUTAO 32 Bible Online

LOUTAO 32 - Poumei Naga bible

LOUTAO 32

¹Asayu maitao sü thaomai-e toulouzü puletao vei mahmo khaipeiyu maitao-e ae puletao nou soumah pfümah khaitouyu khesü poku peiyu maitao-e.

²Asayu mai nasü MAPAO nou puhye mahwe tea mah dukakhai peimoyu mai, ae puletao nou soumah pfümah khaitouyu khesü poku peiyu maitao-e.

³Enou avei mah khesü paopa loumoa bukhai-e, Enou heamajü dopfüa kra-a buyu donou avei vasou sü shisho loure.

⁴MAPAOwo, nenou Eye hea-khei sümoa tudee peiyu donou avei khouko sü teilüyu phaki teinai nou dzü khesü phutheyu büa phuthewure.

⁵Süthaisü avei mahmo khesü Enou ne hi paopa-e; Enou soumah pfümah khaitouyu khesü ali koute-a poku moa ne hi mahlapa peie. Enou ne hisü avei mahtao paopa bailaire tea ale laloue, ae nenou avei mah veishi sü khaipeie.

⁶Südonou ne chi züa buyu mai hrülaiye panou ne hi veachi pao-a kholo, veahoyu hai dzüdu veyu büa veyuma puletao hi koute loulai moe.

⁷Ne hai Enou tutsüa bailoure buh nasüe, E veahoyu phaki nenou Eye vupa peie. Nenou Eye khailupa peiyu ae vupa peiyu sü Enou shusoua lou soulai.

⁸MAPAO nou paoe, “Neletao nou ludu kalova talai touyu nasü Enou paodou peilai, Enou neletaoye paodou poa khosa-a tapeilai.

⁹Neletao hai tsü hayu rhei moa rheisüh büa voyu souso, puletao vei mü sü khaloua rai nou phulou moyu thaio puletao hai paochi zülai moe.”

¹⁰Mai ashi maitao louzü veaho-a bailai, ana MAPAO ye louche-a buyu maitao louzü puhnou tobai soumoa leshiyu nanou vupaloua bailai.

¹¹Cheche-a buyu maitaore, MAPAO vei zhih hinou asalo, ae puh chi züa buyu maitao, sasho-a nou shusou shakhaio.