Read Poumei Naga LOUTAO 33 Bible Online

LOUTAO 33 - Poumei Naga bible

LOUTAO 33

¹Checheyu maitaore, MAPAO zhih hinou asalo! Puh chi züa buyu maitao, puhye paosho khaio.

²MAPAO ye gaigou poloua lou sousho khaio, lou souyu basei khenou poloua puhye lou sousholo.

³Puhye lou ashu nou sousholo, lanabvü sü soutaosoua kalo, ae shusoua asasho poa nou lou soukhaio.

⁴MAPAO vei chipao hai cheche-e, ae puhvei vah teitei hai louche louveie.

⁵Puhnou acheche ae kaozü nasü jüpa-e; puhvei tobai soumoa leshiyu nasü nou deiphao veishi sü phoutao-a nou bue.

⁶MAPAO vei kharochi hinou raki sü souloue, khouh, teinghi, ae vuhtao hai puhvei chipao nou souloue.

⁷Puhnou zaidu teitei sü buh ali hi pove khaipeie; puhnou zaidu hi buyu dzü veishi sü na pokhaiyu kide ali hi khaipei-e.

⁸Teideiphao teitei nou MAPAO ye tholo! Deiphao hi hrüyu mai hrülai nou puhye tsükhoulo.

⁹Puhvei chipao sünou teideiphao soupeie; puhvei kharochi hinou na veishi sü paloue.

¹⁰Tyahrü khenou tsüchoda khaitouyu khesü MAPAO nou halia moyu hi southou khaipeie; maikhe mainou soulai tea tsücho-a buyu khesü puhnou pa soulou moe.

¹¹Ana MAPAO nou tsüchoda khaitouyu khewo akhai koute bukouloua baiwe; puhnou soulai tea buyu vahtao hai khaphao teitei hi vete baiwe.

¹²Savayu tyahrütao hai thaothao mai-e toulouzü, MAPAO ye puletao vei Ramai soulouyu maitao-e; ae puhnou puhvei mai panou soulai tea dopa louyu maitao-e.

¹³MAPAO nou raki vanou zhikou mai hrülaiye zhingaowe.

¹⁴Puhvei vebuh hinou puhnou zhukou deiphao mai hrülaiye ngaowe.

¹⁵Puhnou puletao vei tsüle sü soupeie, ae puletao nou soupfüyu vah teitei sü puhnou süwe.

¹⁶Veo mai ali hai puhnou reihmai veishoa buyu vanou reih veilou moe, reihmai ali hai puhvei khouko vanou ngalou moe.

¹⁷Reih veiloure donou rheitao ye louche-a areih buyu sü hamako baie, puletao vei khouko sünou puletaoye khailupa peilou hoe.

¹⁸MAPAO nou puh chi züa buyu maitao, ae puhvei tobai soumoa leshi peiyu nasü louche-a buyu maitaoye kho peiwe.

¹⁹Puhnou puletaoye sü thaire hinou khailupa peie, ae tokaa veyu phaki-a panou hria bulouwe.

²⁰MAPAO hai Eletao vei areih nasüe, puh hai Etaoye vupa apeio ae soukha apeio nasüe.

²¹Etao hai puh vanou asawe, puhvei sheeyu zhih nasü Etao nou louche-e.

²²Oh MAPAOwo, Etao nou neye louchewe; Etao vei areih nasü ne hinou buyu thaifüa nevei tobai soumoa leshi peiyu nasü Etao hi bupeio.