Read Poumei Naga LOUTAO 36 Bible Online

LOUTAO 36 - Poumei Naga bible

LOUTAO 36

¹Mahmo sounüyu hai mai ashi maitao vei tsüle hinou bua baiwe, puletao hi Ramai touyu hai ha-e, ae puhye tsükhouyu hai-a ha-e.

²Daiolouzü puletao sü lahye veisho-a ae kushoa nou tsücho-a bubaiwe, puletao vei mah khesü Ramai nou ngaolou paimoe, ae puletaoye ngaora paimoe tea lah tsücho-a bubaiwe.

³Puletao vei chipao laqo hai shiyu ae dayu khaiko baie, tsüdo aveih ae vah aveih souyu nasü puletao nou thaokhaiwure.

⁴Puletao nou züphao hinou dazüa buyu phaki-a vah ashi soure donou tsüchoda-a bubaiwe; puletao nou soupfüyu vah teitei sü veiyu aliro ha-e, ae puletao nou ashi nasü malaikhai moe.

⁵Oh MAPAOwo, nevei tobai soumoa leshiyu nasü raki hi khetere; ae nevei chilee checheyu nasü ratei hi koute-a khere.

⁶Nevei achehe nasü deichitao büa kukhere, nevei kaozü nahai zai thouyu büa thoushore. Mai ae soukhaona khesü nenou kiko peie.

⁷Oh Ramai, nevei tobai soumoa leshi peiyu nasü daizhou koute muhtei-e! Etao nou nevei shouh khe hinou bailouyu buh nasü ngaoloue.

⁸Nenou Etaoye touso alao soumoa peikhai touyu khesü Etao nou nevei ki hinou khonü nüa bue; ae nenou Etaoye savayu reidzü hinou dzü sü panou küa bue.

⁹Daiolouzü ne hi hriloure dzüla sü bue, ae nevei ava hisünou Etao hai vayu ngaoloua nou bue.

¹⁰Neye süa buyu maitao hisü nenou leshipu peio, ae acheche maitao hisü vah aveih soupu peio.

¹¹Khaophu souyu maitaoye panou Eye taida peiso, moyuma mai ashi maitao nghoujü nou Eye panou tutaso.

¹²Mai ashi maitao nou kaodu tayu sü zhukhaio. Puletao hai dazüa bure, lashupu louhore.