Read Poumei Naga LOUTAO 40 Bible Online

LOUTAO 40 - Poumei Naga bible

LOUTAO 40

¹Enou MAPAO vei soukha sü heamea poa nou kho-e; süthaisü Enou krayu avei pai sü puhnou keinou peie.

²Puhnou Eye ngaopi shoyu deibvü hinou süthaipa peie, thailou veiyu konai hinou daopa peie. Puhnou Eye chuhdu phaova popa khaipeie, ae kaozhou ashi hayu buh hi popa khaipeie.

³Puhnou Eye lou ashu ali doupeie, Etao Ramai ye soushore lou ali. Maikhe mainou hainasü ngaolouyu phaki ngaopilai, ae MAPAO ye puletao nou louche loulai.

⁴Basharaye phouta moyu moyuma cheche moyu rahtaoye thomoyu maitao, ae MAPAO ye louche louyu maitao hai savayu maitao-e.

⁵Oh Etao Ramai MAPAOwo, nenou Etaoye donou vah alao soupeie, neye raiyu mai ali-a ha-e! Nenou Etaoye donou khupayu vah alaosou soupeie, Enou sütao hai paove khaite louhoe— sütao hai chosha louhoe!

⁶Posheela peiyu ae sapeina khesü nenou jüpa moe; mei nou dei-a posheela peiyu kikhaorü ae mahmo souyu donou tea posheela peiyu khesü nenou kho moe. Ana keinoulou süyu noubei sü ahi peie,

⁷südonou Enou haibüa chila peiwe, “E hai hinou bue; Eye paodou peiyu khesü nevei chikha larübvü hinou bue.”

⁸Nevei leli nasü Enou jüpa shopoa nou souwe, Oh avei Ramai! Nenou paodou peiyu khesü avei tsüle hi pothou khailoure.

⁹Oh MAPAOwo, nevei maitao nou vejüa buyu hrohinou nenou Etaoye khailupa peiyu ko aveih nasü paongaolai. Enou ko hai khesü thaokhai toumoa pao-a buyu sü nenou süwe.

¹⁰Enou nevei khailu-apei ko aveih nasü alekhe hinou poku khaimoe, Enou nevei chilee checheyu ae soukha peiyu khesü mai hi pao koute-a bue. Enou nevei chileeyu ae tobai soumoa leshiyu nasü maisou vejüa buyu buh hinou shapao peimoa zei tea bukhai toumoe.

¹¹Oh MAPAOwo, nevei zhuvea leshi peiyu nasü ahinou deraita peiso. Nevei leshi peiyu ae chilee checheyu nasü panou Eye teisa nou kiko peiyu sü soupeio.

¹²Chosha louhoyu hashi ae veahoyu sünou Eye sühao loure, avei mahmo khenou Eye sü phumu louyu donou Esü halia ngaolou hore. Sütao hai avei peishu potao jünoua pouloure, südonou Esü chathai tare.

¹³Oh MAPAOwo, Eye khailupa peio! Chunou Eye soukha peio!

¹⁴Eye southalai tea teyu mai hrülaiye sü panou hraongu ngaoyu sü soupeio, ae puletaoye cho ha-a nou pa bürarou-a bupeio. Enou veahoyu phaki lesa-a nou buyu maitaoye sü panou pah ashi sü ngao-a nou dakhai tapeio.

¹⁵Eye konüa laiyu maitaoye sü panou haongao-a kangheiyu sü soupeio.

¹⁶Ne hi velouyu mai hrülaiye sü panou asah soua vasayu sü soulo. Nenou khailupa peiyu donou ne hi kalo pao-a buyu maitaoye sü panou teisa haibüa pao-a bulo, “MAPAO hai daizhou koute dusa!”

¹⁷Oh MAPAOwo, Ewo lülou hore, ae touhare, ana nenou Eye ngaipei moe. Ne hai Eye khailu apeio ae avei Ramai-e, thashoa nou tave Eye soukha peio!