Read Poumei Naga LOUTAO 5 Bible Online

LOUTAO 5 - Poumei Naga bible

LOUTAO 5

¹Avei chipaotao keinou peio, Oh MAPAOwo; alia Enou lichoyu khesü aetou peio.

²Enou ne hi soukha peio tea shayu avei paila sü keipeio, avei Ramai ae avei Veo! Enou ne hi veachi paowe, Oh MAPAO;

³nenou shona-a avei veachi keipeie, teinghi payu phakia Enou veachi pao-a khoe, alia nevei chila nasü Enou khoa bue.

⁴Newo vah ashi souyu hi jüpayu Ramai moe; ne nghingao hi hashi ali-a nenou aetou moe.

⁵Khaophu souyu maitao hai ne nghingao hinou la-a buthoulou hoe; mai ashimai hrülaiye nenou ngaorae.

⁶Dayu chi paoyu mai hrülai hai nenou souhawulai, ae zhaipou shimai alia la-lu süyu maiye nenou ngaorae.

⁷Ana nevei dushoyu lesha vanou nevei ki hisü Enou tave loulou veie; Nevei sheeyu Rathoki hinou ve Enou ratho louveie, ae neye khuhao-a thora louveie.

⁸Oh MAPAOwo, Eye zhuba ngaobayu mai alao bue! Nevei leli soure donou Eye bo ngaopeio; Eye panou nevei ludu hi taloure donou nevei ludu souzü peio.

⁹Puletao vei chipao hai louchelou veiyu hae, puletao hai souha peire likhei jüpa-a bubaie. Puletao vei raoqulu hai thaimai khü ali kheihaoe; puletao mali hai maiye thao-a jüyu khaikho baie.

¹⁰Puletaoye nenou souha peio, Oh Ramai; lah puletao vei ashi kheido hinou pa hakata theo. Puletao vei mahtao donou ae puletao nou neye hraiyu vanou puletaoye ne nghingao hinou hulai peio.

¹¹Ana neye lüa louche laimai hrülaiye panou salo; puletaoye panou teisa sa-a lou soukhaio. Neye leshi-a buyu maiye sü vupa peio; daiolouzü ne hinou pa puletaoye sayu sü ngaolo.

¹²Ne chi züyu maiye nenou hapeie, Oh MAPAO; nevei leshi nou rü ali büa puletaoye vupeilo.