Read Poumei Naga LOUTAO 50 Bible Online

LOUTAO 50 - Poumei Naga bible

LOUTAO 50

¹Khoukhoulai Ramai MAPAO nou paowe; puhnou teinghei palova nou poa teinghei loulova koute hinou hrüa buyu maitaoye kua bue.

²Zion nuhdu hisünou Ramai vei hüveiyu, ae chekhoyu nasü varoua nou bue.

³Etao Ramai hai velaire, ana nasei-a velai moe; puh nghoujü hinou mei sü taotutu poa nou ae puhvei pehao veishi hisü teikhai teirü ashi sünou sühao poa velai.

⁴Puhnou puhvei maitaoye chikuyu sü takou zhupeia shaki soupeio tea raki ae deiphao sü kuwe.

⁵Puhnou paoe, “Eye koa posheela peiyu sünou vo soukhai touyu maitao, ae chilee cheche-a buyu avei maitaoye sü ahi save jüpeio.”

⁶Raki nou Ramai hai cheche-e tea paopa peiwe, daiolouzü Ramai puhnou chiku-apeio nasü baie.

⁷“Oh avei maitaore, Enou paoyu chi keilo; Israel maitao, Enou ne pei hisü aetounü moyu chi paolai. E hai Ramai-e, neletao vei Ramai nasüe.

⁸Neletao nou Eye posheela peiyu donou vamoa E neletaoye zümoe; neletao nou mei dei-a posheela peiyu nasü tobai soumoa soupeiwe.

⁹Enou neletao vei chokhome hinou chodetao moyuma zhaotume hinou zhaotu khesü E jüpa moe;

¹⁰vaohro hinou buyu soukhaona teitei ae deichi thethe hinou hrüyu kikhaorü veishi sü avei khaitou baie.

¹¹Ratei hinou zhaoh-a buyu raohou teitei, ae deiphi hinou lüa buyu veishi sü avei baie.

¹²“Enou houzüa bure touyuma, Eye touso peio tea neletao hinou kholai moe, daiolouzü teideiphao ae sühinou buyu na veishi hai avei baie.

¹³E chode sou sü touvu moyuma zhaotu zhe kewu?

¹⁴Neletao nou kalo paoyu sünanou Ramai hi posheela sü soupeio, ae neletao nou soulai tea chaachou soukhai touyu puhsü Kukulai nahi cheche-a souvete peio.

¹⁵Neletao hi veahoyu veyu phaki Eye kulo; Enou neletaoye khailupa peilai, ae neletao nou Eye paosholai.”

¹⁶Ana Ramai nou maishi mai hi haibüa paoe, “Neletao kabüa nou avei chikha khesü phouwe? Kabüa avei Vo vanou phaku khaige?

¹⁷Neletao hai Enou tudee-a souzü peiyu nasü poba-e, ae avei chikha khesü züba-a thaokhaire.

¹⁸Neletao hai vaoyu mai aliye daolouyu phaki puhye koa sa-a tare, ae khulou souyu maiye samai khamai soutare.

¹⁹“Neletao hai teisa nou chi la ashi paore donou souda-a bu baiwe, alia piyu ae hraoyu halia ha-a nou neletao hai chaochao soua dachi pao baiwe.

²⁰Neletao hai lah neletao vei thaihou jürai maitao koute-a paoshi pei baie, ae puletao vei mah khesü phoupa peilai tea lai-a baiwe.

²¹Neletao nou vah haibüyu khesü souwe, ae Enou chi lia paomoa bupeie, südonou neletao hai E-a neletaoye raibü baie tea tsü choloure. Ana chuo Enou neletaoye sü züvei talai, ae neletaoye souzüpei talaire.

²²“Eye thao-ngai-a tayu maitaore, haisü keilo, molouzü Enou neletaoye sü souhawu bailai, ae mai linoua neletaoye sü khailupa peilou hoe.

²³Kalo paoyu hai Eye tsükhou-a posheela peiyu nasüe, ae achi züyu mai hrülaiye sü Enou khailupa peivu zülai.”