Read Poumei Naga LOUTAO 51 Bible Online

LOUTAO 51 - Poumei Naga bible

LOUTAO 51

¹Oh Ramai, nevei tobai soumoa leshi peiyu nasü nou Eye zhuvea peio. Nevei dushoa buyu zhuvea leshi hisünou avei mah veishi sü khaipeio!

²Avei tsüle ashi teitei sü khüshee peio ae avei mahmo khesü soushee peio.

³Avei kaozü moyu nasü Enou süwe; avei mahmo khesü tobai soumoa anghoujü hinou bue.

⁴Enou nevei ngheingao hinou mahmo khesü soukoute-a bure, ae ne nghoujü nou vah ashi khesü soupfüwure. Südonou nenou Eye tudeeyu hai kao-a baie, ae nenou Eye paoshiyu hai zü baie.

⁵E hai mah ae ashi nasü soua nou nakou peia baie; ae apfü pou hinou Esü mahmo soua hrükou baie.

⁶Chili checheyu nasü nenou jüpa-e; nevei ratsü nasü avei tsüle hi thoukhai peio.

⁷Avei mahmo khesü polai peio, sükulouzü E hai sheesha tea bailai; Eye dzü khü peio, ae Esü vüra jünou kaapua bailai.

⁸Eye panou savayu kho khesü choulo; sükulouzü nenou Eye souphe soupho sasa-a khaitoua buyuma Enou savayu sü ngaopu lousüe.

⁹Avei mahtao hinou nevei ngheithou sü pfüvai peio, ae avei ashi teitei sü souha peio.

¹⁰Oh Ramai, sheesha touyu lüthou ali Eye soupeio, ae tsüle ashu ae nevei khakhe hinou hrülou süyu rako ali Eye peio.

¹¹Eye nevei nghoujü hinou hulai peiso; ae nevei sheeyu rako nasü ahinou pota peiso.

¹²Nevei khailu peiyu asah nasü Eye peipulaiwo, ae Eye panou ne chi zünüsho-a zülo.

¹³Süthaisü Enou mahmo souyu maitao hi nevei chikha khesü doupeilai, ae puletao nou ne hisü dakhai velai.

¹⁴Eye khailupa peio, Oh Ramai, avei hrümamai sü vupa peio, ae Enou nevei acheche nasü shusoua shapaolai.

¹⁵MAPAOwo, Eye chi paoloure donou soukha peio, ae Enou neye sü paosholai.

¹⁶Daiolouzü ne hai posheela peiyu khesü jüpa moe, Enou neye mei dei-a posheela peiyuma nenou sükhesü thainülai moe.

¹⁷Oh Ramai, Enou tainou souyu rako sünou neye posheela peiwe; le pepoyu ae leda louyu lüthou hai nenou ngaora laimoe.

¹⁸Oh Ramai, Zion ye sü zhuvea nou soukha peio, pepota-a buyu Jerusalem kivo khesü soushu dakhai peio.

¹⁹Süthaisü kaozü hinou posheela peiyu, ae nenou jüpayu hinou meidei-a sheela peiyutao, ae chode khesü nevei posheelabu hinou poa sheela peilai.