Read Poumei Naga LOUTAO 59 Bible Online

LOUTAO 59 - Poumei Naga bible

LOUTAO 59

¹Oh avei Ramai, Eye ngaobayu maitao hinou Eye khailupa peio, Eye dua laiyu maitao hinou Eye vupa peio.

²Maishi maitao bah hinou Eye popa peio; maiye southayu maitao hinou Eye vupa peio.

³Zhukhaio, puletao nou Eye southare donou da-a bure, zhaipou shiyu maitao nou Eye soushire donou tave meime soua buloure. Puletao nou haibüa souyu hai Enou soumah pfümah khaitouyu donou moe,

⁴moyuma puletao nou haibüa thashoa nou tupove souda-a buyu hai, Oh MAPAOwo, Enou mahmo soukhai touyu donou moe.

⁵Khoukhoulai Ramai MAPAO, tashulo, ae tave Eye soukha peio; Israel maivei Ramai, hai khesü ne lah zhukhaio! cheche moyu rataoye tho-a buyu maitaoye sü tudee peio. Maishi maitaoye sü zhuvea peiso.

⁶Puletao hai teimai loukhai-e dakhai vewe, ae puletao hai sei büa daopoa nou nuhdu hisü takou takhe-a laiwe.

⁷Puletao nou chi la ashi paoyu ae pirayu khesü kei khaio. Puletao vei mali hai khoche büa bue, anou puletaoye mai linoua süpai moe tea puletao hai lah tsücho-a bue.

⁸Ana Oh MAPAOwo, nenou puletaoye sü konüe, nenou cheche moyu rataoye tho-a buyu maitaoye sü jünü peiwe.

⁹Oh Ramai, Enou nevei khouchi nasü louchewe; ne hai avei baibuh nasüe.

¹⁰Avei Ramai nou puhvei zhuvea leshi hinou ahi velai, Eye ngaoba-a buyu maitao nou haka tayu sü puhnou Eye panou ngaoloulai.

¹¹Oh Ramai, avei maitaoye panou licho loure donou puletaoye southa peiso. Nevei khouko nou puletaoye sü soupho rarou laikhai peio ae hraongu soupeio. Oh MAPAOwo, Etaoye vupa-apeio.

¹²Puletao vei mü hinou paopayu mah, ae puletao vei mütai hinou paopayu chipaotao; puletaoye khaophu souyu sho-rü hinou pa mulouyu sü soupeio! Puletao nou maiye chaayu ae dahühüa laiyu donou.

¹³Nevei lekha rarou hisünou puletaoye souha peio, puletaoye sü souhakhai toupeio. Süthaisü Ramai nou Israel maiye khasa-a nou hrüwe, ae teideiphao teitei-a puhnou khasa-a nou bue touyu hai mai hrülai nou süloulai.

¹⁴Eye ngaobayu maitao nou koukhe loukhai-e dakhai vewe, ae puletao hai sei büa ngirapoa nou nuhdu hisü tasühao-a laiwe,

¹⁵puletao hai sei büa tahao poa nou touso sü phouwe, ae puletao nou pou phou reikhayu sü ngaolou mokhaie kheimathe sü rapoa nou laiwe.

¹⁶Ana Ewo louzü nevei khouko nasü lou soushoa nou bulai, ae shona chüsü Enou nevei tobai soumoa leshi peiyu nasü shusoua lou soulai. Daiolouzü nenou avei baibu nasü soupeie, ae veaho vedao-a buyu phaki-a ne hinou Eye sü panou baichaoloue.

¹⁷Eye vupa-apeio, Enou neye paosholai. Daiolouzü Oh Ramai, ne hai avei baibu nasüe, ae Eye tobai soumoa leshi peie.