Read Poumei Naga LOUTAO 68 Bible Online

LOUTAO 68 - Poumei Naga bible

LOUTAO 68

¹Ramai ye sü panou tashuloua puhye ngaobayu maitaoye sü panou soupho rarou laikhaio. Puhye ngaora-a buyu maitao hai panou puh nghoujü nou tutawo.

²Meikhao hai teikhai nou hüpoa tayu büa puhnou puletaoye sü hutawure; laivou pheroh nahai mei hüpeikhai dzü kütayu büa mai ashi maitao hai Ramai vei nghoujü hinou hatare.

³Ana acheche maitao hai lesa sho-a nou puhvei nghoujü hinou vasa-a nou bue; puletaoye sü panou asah soua nou bulo.

⁴Ramai hi lou soukhiao, puhvei zhih sü lou nou sousholo; teihao phao hinou rhei pfüa tayu puhvei ludu sü souda peio. Puhvei zhih hai MAPAO toue, puh nghoujü nou asalo!

⁵Ramai hai puhvei sheeyu Rathoki hinou bue; puhnou rounahtou taovei pfüpuo sü soupeie, ae mimea maipfütaoye sü vupa peiwe.

⁶Puhnou dopfüa lah likhei buyu maiye panou buchao loure donou ki sü peie, ae hukhaki hinou buyu maiye sü sapa panou lahdo sou-a savayu sü peie. Ana puhye khaitya duyu maiye sü panou dopfüa mai hrümoyu buh hinou hrülai.

⁷Oh Ramai, nenou nevei maitaoye süthaisa-a tayu phaki nenou radeiki hi takouyu phaki,

⁸deiphao sü lüre, ae ratei hinou teirü sü rükoure, daiolouzü Sinai Deichi hi Ramai nou takouyu donou, ae Israel maivei Ramai nou takouyu donou.

⁹Nenou tei sü panou rücha toupeie, sübüa shitayu teideitao sü nenou souveipu peie.

¹⁰Nevei maitaoye sü panou sübüa buh sütao hinou hrülouyu sü soupeie, nevei zhai aveih hisünou veaho-a laiyu maiye donou nenou souda khaipeie.

¹¹MAPAO nou kharochi sü peie, ae naotumai taoli nou ko aveih nasü pota-e;

¹²“Veo maitao alia puletao vei reihmai metao sü tutare!” Ki hinou buyu naotu maitao nou polouyu na khesü zha zhiloue:

¹³shahu nou souhokhai touyu rahoutao, sütao vei shouh hai sana veitya bütoua reivavawe. (Neletao kamai-a daisounou reih souyu teithe zhou hai zhaotu khaiyu buh hinou buwe?)

¹⁴Khoukhoulai Ramai nou veo maitaoye Zalmon deichi hinou soupho rarou peiyu phaki, puhnou buh sühisü panou vüra sü koue.

¹⁵Bashan deichi nasü daizhou koute khouchi-e, deichi süna hai deitao taoli bue!

¹⁶Neletao daisounou khouchi shoa buyu deichi hinou Ramai nou hrüre donou dopa louyu deichi vanou maiye ngaorai-a nou zhuwe? MAPAO nou sühisü teisa nou hrüa bulai!

¹⁷Rheiluki thethe pfüa nou MAPAO hai Sinai deichi hinou sheeyu buh hisü velai.

¹⁸Puhnou kushoyu buh hisü hukhamai taoli nüpoa patare; puhye khaitya-a duyu maitao hinou sapeina khesü puhnou poloure. Ramai MAPAO nou sühisü teisa nou hrülai.

¹⁹Eletao vei veakou hai teisa nou pfükha peia buyu MAPAO ye sü paosholo, puh hai Etaoye khailupa peiyu Ramai nasüe.

²⁰Etao Ramai hai maiye khailupa peiyu Ramai-e; puh hai MAPAO-e, Etao vei MAPAO süe, Etaoye athai hinou khailupa peiyu nasüe.

²¹Ramai nou puhye ngaoba-a buyu maitao pei dakho peilai, thaokhai toumoa mahmo soua laiyu maitaoye sü puhnou souha-a bailai.

²²MAPAO nou paoe, “Neletaoye ngaobayu maitaoye sü Enou Bashan hinou podakhai ve peilai, Enou puletaoye sü zai thoushoa buyu hinou podakhai ve peilai,

²³sübüa neletaoye ngaobayu maitao vei zhe hinou neletaoye panou hopoa talai, ae neletao vei sei khesü panou puletao vei zhe hai tounü sha sü laitoulai.”

²⁴Oh Ramai, avei veo, nenou veiloua tayu, ae nenou tapoa nou sheeyu ki hi talouyu sü mai hrülai nou zhingaore.

²⁵Lou souyu maitao nou nghoujülo nou bue, lousouyu basei poyu maitao nou thailova bue, sühai kohinou naotu maitao nou beibei da poa nou bue.

²⁶“Maisou vejüa buyu hinou Ramai ye paosholo; MAPAO ye paosholo khaio, Jakob vei tyaosholea maitao!”

²⁷Rairaikai soua taikayu Benjamin maitao nou veloue, süthaisü Judah hi süthai-apei maitao nou puletao vei me sa-a nou taloue, puletaoye thaifü poa nou Zebulun ae Naphtali hi süthai-apei maitao nou veloue.

²⁸Oh Ramai, nevei khouko nasü popa ngaopeio, Etao thaosoua raichoki nevei khouko nou soupeikhai touyu nasü ngaopeio, Oh Ramai.

²⁹Jerusalem hinou buyu nevei Rathoki donou veo maitao nou ne hi sapeina khesü pove peie.

³⁰Rekhaona zhai büa buyu Ejipt ye chaa peio; tyahrütao, chokhome hi buyu chodetao ae chotoutu noupu chaa peio. Seihla thainüa buyu mai hrülaiye sü phi nou taidei sasa khaipeio, soureih souyu jüpa-a buyu mai hrülaiye sü hupho rarou khaipeio.

³¹Sühseita maitao hai Ejipt hinou ve loulai; Ethiopia maitao nou Ramai hi bah lapoa nou veachi paolai.

³²Ramai ye lou sousholo, deiphao hi buyu vedeitao, MAPAO ye lou sousho khaio,

³³raichoki nou buyu ratei vanou rhei pfüa tayu puh hisü! Keilo, shura soua nou ra-a buyu puhvei pei nasü.

³⁴Ramai vei khouko sü shapao peikhaio; puhvei aduso sü Israel mai hi bue, puhvei khouchi sü ratei vanou bue.

³⁵Ramai hai puhvei sheeyu ki hinou tapayu phaki daizhou koute ngaokhupa-e— Israel maivei Ramai hai! Puhnou puhvei maitao hi pfüchi ae khouko sü peie. Ramai ye Paosholo!