Read Poumei Naga LOUTAO 69 Bible Online

LOUTAO 69 - Poumei Naga bible

LOUTAO 69

¹Oh Ramai, Eye khailupa peio! Dzü nou angu hisü khe loure.

²Esü thoushoa buyu konai hinou füloure, ae aphi tailoure buh ali-a hare; Esü dzü thouyu hisü loure, ae dzü nou Eye sü maolou laire.

³Eye soukha peio tea kuyu donou Esü shaloure, ae araoqulu sü thekei lure. Nevei soukha peiyu nasü vuzhi-a buyu donou anghithou sü ha zhuthou louhore.

⁴Qo ha-a nou Eye ngaorayu maitao hai avei peishupo jünou pou loure. Eye ngaobayu maitao nou apei hi mah dukakhai peie; puletao hai khoushoe ae Eye southa nüsho-a bure. Enou halia vaolou moyuma Eye vaoloure tea natao sü panou peidakhaire.

⁵Oh Ramai, Esü vava-a nou bubaie touyu sü nenou süwe. Avei mahmo khesü ne nghoujü pokukhai moe.

⁶Khoukhoulai Ramai MAPAO, Eye donou neye louche-a buyu maitaoye sü panou hraongu ngaoso! Avanou neye tho-a buyu maitaoye sü panou pah shiyu sü ngaoso, Oh Israel maivei Ramai!

⁷Neye donou Esü maichi mairao sü toua bure, ae hraongu sü Enou pfüa nou bure.

⁸Esü athaihou jürai maitao hinou shetumai ali büa baire, ae akikha mai hia Esü vakou mai ali büa bure.

⁹Nevei Rathoki nasü leshiyu sünou ale hisü mei nou rou soure; ae ne pei hi mainou rao-a paoshiyu khesü apei hi vere.

¹⁰Enou lüh-a nou nataiyu hrü hinou hrüa bue, ae maikhe mainou Eye ngaohi-a paoshire;

¹¹Enou dopfüa laiyu vei sabanü banoua bukhaie, puletao nou Eye sü konüa baire.

¹²Eye sü puletao nou paoshi-a nou lai-a baire, ae zhaoh sozhia buyu maitao-a avanou lou sü dapalou soua bubaire.

¹³Ana Ewo louzü, ne hi veachi pao-a nou bua bailai, MAPAO; Oh Ramai, nenou jüpayu teile hisü nou Eye chila peio. Nevei leshi zhuvea hinou Eye chila peio, daiolouzü nenou Eye khailupa peilai tea apaokhai toue.

¹⁴Eye panou süh/konaita hi leilouta more donou khailupa peio, Eye ngaobayu maitao hinou vupa peio, ae dzü thoushoyu hisünou khailupa peio.

¹⁵Dzüdu nasü panou ahi vepeiso; Eye panou zaidzü hinou maothaso moyuma khü hisü delou peiso.

¹⁶Oh MAPAOwo, nevei tobai soumoa leshi peiyu hisünou avei veachi keinou peio; nevei dushoa buyu zhuvea leshi hisünou ahilo reidakhai vepeio!

¹⁷Nevei kilai ahinou ne zhu sü pfüku peiso; Esü veaho shoa nou bure— chunou avei akho nasü keipeio.

¹⁸Ahi tave peio ae Eye khailupa peio; ngaobayu maitao hinou Eye vupa peio.

¹⁹Eye ngaohi-a nou konü peiyu, hraongu soupeiyu ae ngaophou moyu khesü nenou süwe; Eye ngaobayu mai hrülai-a nenou süwe.

²⁰Hraongu soupeiyu sünou alüthou sü souphewure, ae Esü veahore. Zhuvea leshi peiyu nasü Enou vuzhi-e, ana mailia hare; sousava peishulai tea Enou kho-e, ana mailia ngaolou more.

²¹E houzüa laiyu phaki, puletao nou Eye sü maiye shuthayu pou nou thouloua nou peie; E rei-a nou laiyu phaki, puletao nou Eye sü khashoyu dzü nou peie.

²²Puletao nou tovai zhoa buyu nasü panou puletaoye haka tayu sü soupeio; puletao nou khonüh nüa buyu nasü panou puletaoye kaodouyu sü southeo.

²³Puletao vei nghithou sü soucha peio! Puletao vei khya sü teisa panou lülou hoyu sü soupeio.

²⁴Nevei lekha rarou sünou puletao hi lakou peio, nevei chaa sü puletao pei hi vepeio.

²⁵Puletao vei fühao khesü panou thaokhaiwua tayu sü soupeio, puletao vei sahpao hisü mailia panou hrüa buyu sü soupeiso.

²⁶Nenou tudee peikhai toua buyu maitaoye sü puletao nou souvea souchoro peipua nou bure; nenou zhipei khaitoua buyu maitao vei veahoyu khesü puletao nou chipha poa nou bua baire.

²⁷Puletao vei mahmo veishi sü litou touloua khaipeio. Nevei khailupa peiyu hisü puletaoye panou titoulia ngaolouyu sü soupeiso.

²⁸Puletao vei zhih sü nevei hriyu larübvü hinou souha peio; nevei maitao zhih rüyu hisü puletao vei zhih sü rüthou peiso.

²⁹Ana Ewo louzü soure ae veashore; Eye polashu peio, Oh Ramai, ae Eye khailupa peio!

³⁰Enou Ramai ye sü lou nou sousholai; Enou puhvei aduso nasü kalo paoyu noupu shapao peilai.

³¹Haibüyu nasü nou MAPAO ye kikhaorü ae dushoyu chode nou posheela peiyu jünou puhnou jüpapu laihie.

³²Mainou souvea souho-a buyu maitao nou hainasü ngaolouyu phaki, puletao hai lesa sholai; Ramai ye tho-a buyu maitaoye sü le souhro peipulai.

³³Touha sohayu maitao vei veachi sü Ramai nou keipeiwe, ae hukhaki hinou buyu puhvei maitaoye sü puhnou ngaipei moe.

³⁴Raki ae deiphao, zaitao ae sühinou buyu hrikhaona hrülai, Ramai ye paosholo.

³⁵Puhnou Jerusalem sü khailupa peilai ae Judah vei nuhdutao hai soushu dakhai peilai.

³⁶Puhvei kilai maitao vei tyaosholea maitao nou süsü kikaa soua thaoloulai, ae puhye leshiyu maitao nou sühisü hrülai.