Read Poumei Naga LOUTAO 7 Bible Online

LOUTAO 7 - Poumei Naga bible

LOUTAO 7

¹Oh MAPAOwo, avei Ramai, Eye vupeio tea ne hi vewe; athaihua laiyu maitao hinou Eye vupapeio alia khailupa peio,

²sübümo louzü khaosouveo büa puletao nou Eye poa ta-a bailai, mai linoua Eye tave khailu peilou hoyu buh hi pota-a balai, ae puletao nou Eye paidesa sawu bailai.

³Oh MAPAOwo, a Ramai, Enou maitali hi soumahyu bulouzü, Enou asamai aliye shodo souwu louzü, moa hali donou-a moa ngaoba zhubamai hi azhaipou shiwu louzü, haibüyu paitya ali koute-a Enou souwure touyuo—

⁵sübüyu thaio Eye ngaobayu maitaoye panou athai ngoutheo, ae Eye nülou theo, alia puletaoye panou Eye soukao theo, alia ahri hayu thaiphao ali soua deiphao khaiwu theo!

⁶Lekha soupoa tashu peio, Oh MAPAOwo! Eye ngaobayu maitao vei lekha rarou nasü tashu dupeio; lah ne kaishuloua Eye soukha peio! kaozü nasü nenou jüpayu nasüe,

⁷südonou neye sühao-a buyu mai hrülaiye pove jülo, alia ratei hinou puletaoye khosa-a hrüpeio.

⁸Mai hrülai vei chikure nasü ne-e. avei jüpa hinou chiku peio, Oh MAPAOwo; E mah hae touyu sü nenou süwe.

⁹Newo acheche Ramai-e, ae Etao tsüle alia jüpa pei hinou chiku peiwe. Mai ashi maitao nou vahshi souyu khesü souha peio ae mai aveih maiye buu peio.

¹⁰Ramai hai Eye vupa-apeio nasüe; puhnou puh chi züyu maiye khailupa peie.

¹¹Ramai hai checheyu hinou chiku-apeio nasüe, ae ashi maiye teisa nou rarouwe.

¹²Puletao vei ahrü dalou molouzü, Ramai nou puhvei khoche hei roulai. Puhvei louka paipalai alia süsü souda-a bulai;

¹³puhnou puhvei thailou veiyu basei polashulai, alia mei kei-a buyu puhvei louthou nou poshu teloulai.

¹⁴Zhukhaio, maishiyu mainou kabüa hashi khesü chopa louwe; Puletao nou soubüre roloua la-luyu vah souwe.

¹⁵Ana maiye donou rüh southou khaitouyu rüh hisü lah puletaoye muloua bailai.

¹⁶Südonou lah puletao vei ashi nanou puletaoye tudee-a souvea peiwe, ae lah puletao vei zhaipou shiyu nanou puletaoye zhipeiwe.

¹⁷MAPAO vei acheche na vanou Enou puhye kalo paowe; Akukulai hi buyu MAPAO hisü Enou lou soushowe.