Read Poumei Naga LOUTAO 74 Bible Online

LOUTAO 74 - Poumei Naga bible

LOUTAO 74

¹Oh Ramai, daidonou ne haibüa Etaoye thaokhai peiwe? Nevei lekha rarou nasü haibüa teisa nou nevei maitao hisü bua bailaivu?

²Raichoki nou nevei mai panou soulai tea dopakhai touyu maitao, ae maivei qila soua buyu nevei tyahrü naye panou soulai tea khailupa khaitouyu maitaoye sü licho peio. Nenou vuli hrüa buyu Zion Deichi nasü mangai peiso.

³Souka sounghi khaitouyu füdei haina sü tave zhupeio, Etaoye ngaobayu maitao nou Rathoki hi buyu na veishi sü soushikhai touwure.

⁴Neye ngaobayu maitao nou nevei Rathoki hinou kolouyu reihvo sü soua bure; puletao nou veilouyu shee soua sühi sü sahra hrakhai loure.

⁵Puletao nou marei poa süü daoyu mai büa süü khesü vi-a nou bure.

⁶Puletao nou kizha ae deka khesü marei ae hubao poloua dakho sasa khaiwure.

⁷Puletao nou nevei Rathoki nasü soushi laiwua mei deiwure; puletao nou neye thoyu buh nasü souzhaiwure.

⁸Puletao nou Etaoye sü souha zeilai tea bure; puletao nou sheeyu buh teitei sü meidei laire.

⁹Etao vei sheeyu shee veishi sü souhawure; rachipaolayu mai ali-a hare, ae teile kasho-a haibüa bukou laisa touyu hai mailia sümore.

¹⁰Oh Ramai, ngaobayu maitaoye panou teile kaso Etaoye konüa bulaige? Puletaoye panou ne zhih sü teisa nou paoshi-a bailaiwu?

¹¹Ne daisounou Etaoye soukha peibawe? Ne daisounou ne bah sü shaphi loua buge?

¹²Ana nenou araikha hinou Etao vei veo sü soua bue, Oh Ramai; nenou Etaoye sü vutaoli hai khailupa peie.

¹³Nevei khouko sünou zai dzü soukho peie, zai hi buyu khaonghou adu nasü nenou pei khouphe peie;

¹⁴nenou Leviathan khaonghou nasü southa peie, ae puhvei vasou panou radeiki soukhaona taoye panou toue.

¹⁵Nenou dzünghou ae dzüla khesü soupeie, nenou reidzü khesü southe peie.

¹⁶Nenou hea-khei sü soupeie; nenou khouh teinghi sü lahkuku nou bure buh hi soukhai peie.

¹⁷Nenou teidei akhai sü panou hai bailai tea soupeie, nenou ka-hou ae teisai teilü sü soupeie.

¹⁸Ana Oh Ramai, neye ngaobayu maitao nou neye konüa bue touyu nasü licho peio. ae puletao hai Ramai ye louche moe alia neye ngaora-a bue.

¹⁹Nevei lülou hoyu maitaoye sü zhaipou shishoyu ngaoba maitao bah hi thaothou peiso, mainou souvea hoyu nevei maitaoye sü ngaipeiso!

²⁰Eletaoye koa vo soukhai touyu nasü licho peio. Teidei hisü taidayu ae züveiyu sünou buliki phoutao loure.

²¹Mainou souvea souhoyu maitaoye sü panou hraongu ngaoso; veaho-a nou touha soha laiyu maiye panou neye paosholo.

²²Oh Ramai, tashuloua nou nevei kaozü nasü soupei khaio! Ramai ye louche moyu maitao nou neye sü tobai soumoa konüa bue touyu nasü licho peio.

²³Neye ngaoba-a buyu maitao nou lekha soupoa nou sharayu ae tobai soumoa nou paira soua buyu nasü ngai peiso.