Read Poumei Naga LOUTAO 81 Bible Online

LOUTAO 81 - Poumei Naga bible

LOUTAO 81

¹Etaoye vupa-apeio Ramai hi shusoua lou soukhaio; Jakob vei Ramai hi lou sousho khaio.

²Lou soupa peikhaio ae beibei sü dapei khaio; kho keiveih shopoa nou lana ae gaigou sü kapei khaio.

³Khouh ngaorai hi ae khouh toutsü ngaoyu phaki, khonüh nüre donou shabe sü nghoupa peikhaio.

⁴Haibüa soure sü Israel maivei chikha hi bue; ae Jakob vei Ramai nou kharochi peikhai toue.

⁵Puhnou Ejipt maiye duyu phaki, Israel mai hi haibüa soupfülo tea kharochi peikhai toue. Enou raichoki sükhai toumoyu pai ali haibüa choue:

⁶“Neletao phaova nou sühshoa pfüyu koupo nasü Enou haokou peiwure; neletao bah hinou veasho-a polaiyu naichuh khesü Enou neletaoye panou popu khailai more.

⁷Neletao nou veaho-a buyu phaki, neletao nou Eye ku-e, ae Enou neletaoye sü khailupa peie. Enou teikhai teirü ashi hinou tutsüa buyu buh hinou neletao vei akho nasü chila peie. Enou dzüla payu Meribah hinou neletaoye kabü laisa tea zhai zhu-e.

⁸Avei maitaore, Enou paopi peiyu khesü keinoulo; Oh Israel maitaore, neletao nou avei chi kei peilouzü, E lesa sholai!

⁹Neletao hai rah kukheye thokhai tiso.

¹⁰Neletaoye Ejipt teidei hinou sapa peiyu Ramai MAPAO nasü E baie. Enou neletaoye sü kiko peilai.

¹¹“Ana avei maitao hai achi kei bare. Israel maitao hai achi zübare.

¹²Südonou Enou puletaoye sü panou lah rochishoa tanüyu hisü tare, ae puletao nou soupfü nüyu vah khesü panou soutare.

¹³Avei maitao nou achi zülouyu thaio; ae Israel mainou paochi zülouyu thaio E hai daizhou koute lesa laisa!

¹⁴Enou thashoa puletaoye ngaobayu maitaoye sü hraongu soupeilai, ae puletaoye hrai-a buyu maitaoye sü soukanghi khaipei-a bailai.

¹⁵Eye ngaora-a buyu maitaoye sü panou Eye ngaopi-a khurüa bailai, puletaoye sü panou teisa nou hraongu ngao-a bua bailai.

¹⁶Ana Enou neletaoye sü thoudzü veikayu tyanou peilai, ae neletaoye rekou nou buyu laivoudzü nou pa toua rukha-a bubailai.”