Read Poumei Naga LOUTAO 86 Bible Online

LOUTAO 86 - Poumei Naga bible

LOUTAO 86

¹Oh MAPAOwo, Enou khoyu nasü keipeio, ae Eye chila peio, daiolouzü E khouko hare ae lülou hore.

²Eye athai hinou khailupa peio, daiolouzü Enou ne chi züwe; Eye khailupa peio, daiolouzü E hai nevei kilai baie ae Enou neye louchewe.

³Ne hai avei Ramai-e, südonou Eye zhuvea peio; Enou ne hisü teisa nou veachi pao-a bue.

⁴Oh MAPAOwo, nevei kilai Eye sousava peio, daiolouzü avei veachi paoyu nasü ne hi khetere.

⁵Oh MAPAOwo, newo louzü veisho-e ae khaipeiyu nasüe, ne hi veachi paoyu mai hrülai hisü, nevei tobai soumoa leshipeiyu nasü peie.

⁶MAPAO, avei veachi sü kei peio, Enou kra-a soukha khoyu sü noupeio.

⁷Enou veaho-a buyu phaki neye kuwe, daiolouzü nenou avei veachi sü keinou peiwe.

⁸Oh MAPAOwo, neye raiyu ramai ali-a ha-e, nenou souyu büa mai linoua soupfü loumoe.

⁹Nenou soupei khaitouyu tyahrü hrülai nou tave neye khurülai; puletao nou nevei aduso nasü paosholai.

¹⁰Ne hai dusho-e, ae khupayu vah haso khesü soupeie; ne likhei Ramai sü baie.

¹¹MAPAO, nenou Eye panou dai-e sounüwe touyu nasü doupeio, ae Enou chilee cheche-a ne chi zülai; avei hrümamai veishi nou peia nevei kuvah souloure donou Eye doupeio.

¹²Oh MAPAOwo avei Ramai, avei tsüle veishi nou peia Enou neye paosholai; nevei aduso nasü teisa Enou shapaolai.

¹³Nenou Eye tobai soumoa leshi peiyu nasü daizhou koute dusa! Nenou Eye khüh hinou khailupa peie.

¹⁴Oh Ramai, khaophu souyu maitao nou Eye dulai tea laire; ae leshi sümoyu maitao nou Eye southalai tea vere, puletao hai neye ngaophou moe.

¹⁵Ana newo louzü, Oh MAPAOwo, maiye zhuvea süyu ae leshi süyu Ramaie, ne hai teisa nou heamea süyu, zhuvea leshi süyu ae chilee checheyu nasüe.

¹⁶Ahilo reidakhai vepeio ae Eye zhuvea peio, Eye soukhou soutsü peio ae khailupa peio, daiolouzü apfü nou souyu büa Enou nevei kuvah sü soue.

¹⁷Oh MAPAOwo, nenou Eye zhuvea peiwe touyu shee ali Eye ngaopeio, nenou Eye savayu ae soukha peiyu nasü Eye ngaorayu maitao nou ngaoloure toulouzü puletao hai hraongu ngaolai.