Read Poumei Naga LOUTAO 91 Bible Online

LOUTAO 91 - Poumei Naga bible

LOUTAO 91

¹Kukulaio hi velou bulouyu maitao, Khoukhoulaiwo vei shouh khe hinou baibu soua bulouyu maitao,

²MAPAO hi hai büa paolai, “Ne hai Eye vupa-a peio ae kho-apeio nasüe, Ne sü avei Ramai-e, Enou neye louchewe.”

³Puhnou neye kaozhou ashi daore hinou ae thailou veiyu sounou ashi hinou vupa peilai.

⁴Puhnou neye puhvei shouh nou hopeilai; puhnou neye kiko peilai; puhvei chilee checheyu sünou neye khopeilai ae vupa peilai.

⁵Nenou khei teile hi kaozhou ashi daore donou ngaopi laimoe, moyuma heaki mai ashi mainou dure donou pilai moe

⁶moyuma teizhi hinou sounou ashi vere, moa hea teile hi mainou southare khesü ngaopi laimoe.

⁷Ne pehao hinou mai theli kaodu tayuma, moa ne nghiki nou mai thekirou thaitayuma, neye sü hatara linoua soushi louhoe.

⁸Mai ashi maiye kabüa tudee peiwe touyu khesü nenou zhulouzü ngaoloulai.

⁹Nenou MAPAO ye sü nevei baibu souloure, ae Kukulai hi Abuwo nasü nevei kho-apeio sü souloure,

¹⁰südonou kaozhou ashi nasü neye ve dailou hoe, ae taidayu nasü ne nghiki velou hoe.

¹¹Nenou buh tarali hi veyuma Ramai nou rakiva maiye panou neye khosa-a tapeilai.

¹²Neye panou phi sülou more donou puhnou neye puh bah nou süthaisa-a laipeilai.

¹³Nenou soukhaoveo ae nghou khesü phi nou taidei poa taloulai.

¹⁴Ramai nou paoe, “Eye leshiyu maiye sü Enou khailupa peilai, ae Eye MAPAO-e tea süa buyu maiye Enou vupa peilai.

¹⁵Puletao nou Eye kuyu phaki, Enou chila peilai; puletao nou veahoa buyu phaki, Enou puletaoye sü kozho peilai. Enou puletaoye sü vupa peilai ae tsükhou peilai.

¹⁶Enou puletaoye hrü shoyu nasü peilai; Enou puletaoye sü khailupa peilai.”