Read Poumei Naga LOUTAO 94 Bible Online

LOUTAO 94 - Poumei Naga bible

LOUTAO 94

¹MAPAO, ne hai khüngu phou peiyu Ramai nasüe; nevei lekha rarou nasü popa ngaopeio.

²Ne hai deiphao mai hrülai vei chiku-apeio nasüe; tashuloua nou khaophu souyu maitaoye sü puletao nou ngaozü nasü peio.

³Mai ashi maitaoye panou teile kasho sava-a nou bukou laihie? Teile kasho panou puletaoye bukou laihige, MAPAO?

⁴Mahmo soua laiyu maitaoye sü panou teile kasho khaophu soua bulaige?

⁵Oh MAPAOwo, puletao nou nevei maitaoye sü soushi khaipeiwe; ae puletao nou nevei kikaa thaore maitaoye sü souvea souchoro peiwe.

⁶Puletao nou mimea maipfü ae rounahtou taoyesü southa peie, ae Etao teidei hi ve buyu shetumaiye sü taitha datha peiwe.

⁷Puletao nou haibüa paoe, “MAPAO nou Etaoye ngaolou hoe; Israel maivei Ramai nou haisü sülou hoe.”

⁸Avei maitaore, neletao daisounou haizhou koute vowe? Neletao dukinou tsü veipa laige?

⁹Ramai nou Etao vei noubei sü soupeie— puh sü choulou hovu? Puhnou Etao nghithou soupeie— puhnou halia ngaolou horevu?

¹⁰Puhnou tyahrütaoye tuzü peiwe— puhnou puletaoye sü tudee peilou hodou? Puhnou mai hrülaiye sü paodou peiwe— puh hi tsülia hazei baidou?

¹¹MAPAO hai puletao nou tsü choyu nasü süwe; puletao hai daizhou koute tsü chemosa touyu sü puhnou süwe.

¹²Oh MAPAOwo, nenou paodou peiyu maitao, ae nenou nevei chikha khesü doupeiyu maitao hai daizhou koute savayu maisa!

¹³Mai ashi maitaoye donou deibvü heloumo koute nenou puletao sü veahoyu hinou sochao louyu sü peie.

¹⁴MAPAO nou puhvei maitaoye sü thaongai peilai moe; puhnou puletaoye thaokhaia talai moe.

¹⁵Kaozü nasü chikuyu ki hisü dakhai veloulai, ae acheche mai hrülai nou sünasü jüpa-a thaifü talai.

¹⁶Thaonou Eye donou mai ashi maiye dulaige? Thaonou amü poa vah ashi souyu maitaoye dure donou la peilai?

¹⁷MAPAO nou Eye soukha peimoyu thaio, Ewo louzü zei tea buyu teidei hisü tabai laire.

¹⁸Enou paoe, “Esü kaodu talaire;” ana nevei tobai soumoa leshi peiyu sünou Eye soukha peie, Oh MAPAOwo.

¹⁹Enou tsü tyatyali cho-a levea-a buyu phaki, nenou Eye sousava peie.

²⁰Shee moyu chiku apei maitao, kaozü moyu khesü veiwe tea chikha soupeiyu maitao, mai aveih maiye soushi peire donou do ashi phouyu maitao ae mah hayu maiye southare donou chidei peiyu maitaoye koa neletao nou vah souzholou veiyu sü halia hae.

²²Ana MAPAO nou Eye vupa peie; avei Ramai nou Eye kho peie.

²³Puhnou puletaoye sü vah ashi souyu donou tudee peilai, ae puletao nou mahmo souyu donou puletaoye sü souhawulai; Etao Ramai MAPAO nou puletaoye sü souhakhai bailai.