Read Poumei Naga TSÜCHITAO 1 Bible Online

TSÜCHITAO 1 - Poumei Naga bible

TSÜCHITAO 1

¹Tsüchi haitao hai David nahpoutu, Israel mai hi veo Solomon vei tsüchitao-e.

²Tsüchi haitao hai neye panou ratsü ae paodou peiyu, alia tsünghei chipaotao sü panou soutaosou süloure donoue.

³Soulou süyu, acheche, zü alia kaoluyu haitao vei paodou peiyu poloure donou;

⁴chaomeh soumaiye kaozü soupeire donou, nahlemai hi tsüdo alia doro soupeire donou,

⁵tsüveina-a keilou-a süpu loure donou, tsüsümai-a sou-kai ngaoloure donou,

⁶tsüchilee alia zhuzhaili süloure donou, tsüvei mai chipao alia dokai chi süloure donou

⁷MAPAO ye piyu hai tsüdo vei beih-e; Avomai nou tsüvei alia paodou peiyu sü ngaophou moe.

⁸Keilo, anahna, ne puo nou paodou peiyu, alia ne pfü nou doupeiyu sü loubasouo.

⁹Daiolouzü sütaonou neye donou hüveiyu poupa raizao lie, alia ne ngu donou touh-e.

¹⁰Anahna, mahmainou neye jülouzü, aetou souo.

¹¹Puletao nou haibüa paolouzü, “Khe, Etao koa maiye southare donou chaolai! Etao koa mah hayu mai-a kheia soushi peire donou dahlai khe!

¹²Rabedushao büa Etao koa puletaoye hria zhaolou laikhe, alia puletaoye lia shomoa teitei nou belou laikhe.

¹³Mutei na veishi Etao nou ngaoloulai; Etao ki hi shaolou-a pove phoutao loulai.

¹⁴Nevei na buyu veishi Etao hrohi laithouwuo, Etao shabvü ali soua bailai.”

¹⁵Anahna, puletao ye koa ludu tazhoso. Puletao hinou ne tarei tavai talo.

¹⁶Daiolouzü puletao phi hai ashi hi tuho baie, alia puletao nou maiye southayu hi thashoe.

¹⁷Daiolouzü nüloulai tea buyu raohou ngheingao hinou besah laiyu hai hako baie;

¹⁸sükuyuma, mai haitaowo lah puletaoye muloure donou rüh southouwe, lah puletaoye southa loure rüh southoua baie.

¹⁹Zhaipou shia nou ngaolouyu vei ludu sü haibüa baie, sünanou puletao vei hrü sü pota-a baiwe.

²⁰Keilo! Tsüveio nou kijüdu hinou shusoua shawe, hupobu kinou pai chia shapoa kuwe;

²¹ludu hinou puhnou shawe, nuhdu vei rokhubomü hinou puhnou paowe;

²²“Oh voyu maitaore! Neletao daisounou chaomeh souzhouzhou-a bulaige? Teile kashoa neletao nou tsüveiye sü konüa bulai? Alia hrüpeyu taonou tsüdoye ngaora-a bulaige?

²³Enou tudee peiyu chi keitoulo; Enou avei tsütao sü ne hi lapa peilai; Enou avei chipaotao sü neye pa süloulai.

²⁴Daiolouzü Enou neye kue, ana nenou kei peiba-a baire, abah-a thaipa peie, anou mailia poba zhuba-a baire.

²⁵Enou paodou peiyu khesü nenou sümo khokhosoua baire, alia Enou tudee peiyu chitao sü nenou lia popei bare.

²⁶Südonou ne hi veahoyu veyu phaki, alia ne hi teikhai teiro ashi veyu phaki E-a neye konülai;

²⁷ngaopiyu nou ne hi rüraipao büa veyuki, ae tsühayu alia veahoyu nou ne hi teikhai teirü ashi büa veyu phaki Enou neye sü konü peilai.

²⁸Süphaki nenou Eye kulai, sükuyuma Enou chila peilai moe. Lenousou-a nenou Eye phoutalai, sükuyuma nenou Eye ngaolou laimoe.

²⁹Daiolouzü nenou tsüdoye ngaorawude, alia MAPAO ye piyu hai dolou more.

³⁰Enou paodou peiyu hai nenou lia ponü more, alia Enou tudee peiyu chi veishi sü nenou ngaophou more.

³¹Südonou nenou lah nevei shithou sü toulai, alia lah nevei jüpa vahtao soukhai touyu hinou veahoyu sü ngaolai.

³²Daiolouzü chaomeh souyu nasü lah puhnou tsüvei nasü laiyu donou thai-a baie, alia hrüpeyu nasü chaochao souyu donou hakata-a baie.

³³Ana achi keiyu maisü kaozhou veia hrülai, alia kaozhou ashi naye piyu ha-a zokei-a hrülai.”