Read Poumei Naga TSÜCHITAO 11 Bible Online

TSÜCHITAO 11 - Poumei Naga bible

TSÜCHITAO 11

¹Kaomoyu sühdoukhao poyu maiye MAPAO nou ngaora-e, ana checheyu sühdou poyu maisü Puhnou jüpae.

²Khaophu souyu maisü thasho-a hraongu vedao baiwe; ana tainou soumai hisü tsüvei bue.

³Mai aveih maiye tsüle sheeyu nanou süthai peilai, ana mai ashi maiwo louzü puletao vei shodo ashi sünou souha-a bailai.

⁴Kini nou poa chaa ngaoyu teithe hio shupayu hae, ana checheyuo louzü athai hinou vupa peilai.

⁵Mai veiyu maili hai puhvei tsüle sheesha touyu vanou vaphi tea nou hrülouwe, ana maishi mai louzü lah puhvei ashi vanou kaoduta-a bailai.

⁶Chilihyu maivei acheche sünou puletaoye vupa peiwe, ana shodo ashi soumai louzü lah puletao vei dutounü hinou muloua baiwe.

⁷Mai ashi nanou thaiyu phaki, puhvei areih-a koa thaita-a baiwe, alia Ramai samo maivei kini khesü muh liro ha-a bailai.

⁸Acheche maiye veahoyu hinou vupa peilai; anou süna hisü mai ashi mainou thaosou deloua bailai.

⁹Ramai sümoyu nanou puh münou kinapaye soushi peiwe, ana tsüdo süyu vanou acheche maina louzü vupa peiwe.

¹⁰Acheche mainou kaozhou veia buyu phaki, nuhmai-rümai khenou vasa-a buwe; ae maishiyu mai thaiyu phaki, asah soua shusou shawe.

¹¹Chilih checheyu mai livei shiha vanou nuh sü pola pokupa peiwe, ana süsü maishi mai münou soushi souha baiwe.

¹²Kinapamai liye soutaiyu nasü tsü ha-e, ana tsüsüyu mai liwo lapai chamoe.

¹³Mü la-a maichi pao-a laiyu mai nanou kheichi pophao-a baiwe, ana louchelou veiyu mai nawo louzü kheichi poku peiwe.

¹⁴Süthai peimai hayu hisü tyahrü hai kaoduta-a baiwe; ana douzü-apei mai pouyu buh hisü kaozhou veia bulai.

¹⁵Vakou maili vei chimü pfüyu mai nasü lengai-a bailai, ana chimü pfüyu ngaorayu maisü rako veie.

¹⁶Zhuveasüh naotupai nou khuhraoyu ngaoloue, alia zhaipou shiyu mainou chingi ngaoloue.

¹⁷Maiye zhuvea süyu hai lahye donou veia baie, ana hraishiyu mai sü lahye soushilou-a baiwe.

¹⁸Mai shiyu mai sü shodo ashi sünou buu soua ngao-a bailai, ana acheche hinou vuthou khaitouyu mai nasü veikhaimo-a buu aveih ngaolai.

¹⁹Acheche hinou latei toulouyu mai sü hrilai, ana hashi thaihu-a laiyu mai sü thai-a bailai.

²⁰Tsüle shimoyu maisü MAPAO nou ngaorae, ana kaozü vah souyu maisü puhnou leshie.

²¹Cheche vuzünou mai ashimaiye sü souvea peimoa panou talai moe, ana checheyu maitaowo tureipa loulai.

²²Hüvei shoyu naotu linou puh hi aveih ashi sükulou süyu tsü hayu thaio, vo nghou hi sana bahkha ali khikhai touyu büa baie.

²³Acheche mainou jüpa-a buyu khesü haveih nou ngaoloulai; mai ashimai nou vuzhia buyu nasü ngaolouyu phaki, mai hrülai nou rapa-a baiwe.

²⁴Mai kamai-a nou pangai khaimoa pei-zhi koutewe, anou toungipu pa-a baie. Mai kukheli nou peizütao-a peimoa totei sho-e, anou puhsü chejü-a baiwe.

²⁵Tolayu mai liye sü soungi peilai, alia maiye soukha peiyu mai sü soukha hai ngaoloulai.

²⁶Maikhe mainou thoudzü phabayu maiye sü chaa peiwe, ana maikhe maiye thoudzü zhopeiyu maisü shiha ngaolai.

²⁷Haveih nasü lenoua phoulai maisü tsükhouyu sü ngaolouwe, ana hashi phoua laiyu maisü, süna ngaoloua bailai.

²⁸Lahvei nangiye louche-a buyu maisü kaki süünghou raitayu büa raita-a bailai, ana acheche mainawo louzü houki süünghou lapayu büa veishoa bulai.

²⁹Lah puhvei kikhamaiye souveayu mai nasü akhai hi kou haliro bulai moe. Voyu mai nasü teisa nou tsüvei maivei kilai soukoute-a bailai.

³⁰Acheche maivei rashiwo hriloure vei süübe alie, ana zhaipou shiyu nanou hrü sü pota-a baiwe.

³¹Acheche maiye deiphao hinou buu peiyu thaisü, mai ashimai alia mah souyu maiye kazhou koute tudee peipulai!