Read Poumei Naga TSÜCHITAO 12 Bible Online

TSÜCHITAO 12 - Poumei Naga bible

TSÜCHITAO 12

¹Maitalia paodou peiyu sü leshi louzü tsüdo ye leshiwe, ana tudee peiyu naye ngaorayu mai nasü vode.

²Mai aveih mainou MAPAO vei jüpa ngaoloue, ana shodo ashi souyu maiye puhnou ngaorae.

³Shodo ashi souyu mai sü halia soushuloulai moe, ana acheche maivei kamaa sü lükhai tilai moe.

⁴Chapfü veihli hai maipuo vei peirüe, ana haongu pfüve thouyu chapfü louzü puhvei rao hinou tahngiyu büa baie.

⁵Acheche mai vei tsü louzü züwe; mai ashimai vei dou-apei louzü shodo ashi sü baie.

⁶Mai ashimai vei chipaotao louzü maiye southare donou dah-a bubaie, ana acheche maivei chipao sünou puletaoye vupa peiwe.

⁷Mai ashimai sü popa laihwu bailai alia hakata-a bailai, ana acheche maivei kikhamai louzü laloulai.

⁸Puhvei tsüveiyu na thaifüa puhye mainou paosho-e; ana kaozü moyu tsü pfüyu maiye sü mainou ngaorae.

⁹Tai-noutou soua lah vah souyu mai nanou mai nghoujü hinou duso zhaisou-a toure ha-a buyu na jünou veipu hie.

¹⁰Achechemai lisü puhvei kikhaorütao ye soutaosoua kiko peiwe, ana mai shimai louzü zhaipou shisho-a baiwe.

¹¹Kounou shoa tatayu maina sü touso alao bulai, ana komoyu vah liye thaihu-a laiyu puh sü tsü ha-e.

¹²Mai ashi navei ki hai khousho-a soukhaitoua buyuma shita baiwe, ana acheche maiwo soutaosoua maa tsülou latsü loulai.

¹³Hashi soumai nawo lah puhvei chipao hinou muloua baiwe, ana acheche nawo veahore hinou turei paloua baiwe.

¹⁴Nenou chi paoyu ae soupfü khaitouyu thaifüa ne sü buu ngaolai; lahnou souyu vah sü lah hi dakhai velai.

¹⁵Vomai liwo teisa nou lah puhye kao-e tea baiwe, ana tsüvei maiwo mainou paodou peiyu züa tawe.

¹⁶Vomai livei kheitsü hai mainou sühalou baiwe, ana tsüvei mai louzü mainou hrao soupeiyuma shamea loua baiwe.

¹⁷Cheche chi paoyu puhnou kaozü nasü souwe, ana da shaki souyu nanou shodo ashi chi paopeiwe.

¹⁸Paohahayu chipao sü khoche nou khüyu büa baie, ana tsüveiyu maivei chipao sünou maiye souvei peiwe.

¹⁹Dayu haio teile daotili donou baie, ana checheyu louzü teisa nou hria bukou loulai.

²⁰Ashi do phoua buyu mai lüthou hisü shodo ashi nou bue, ana haveih soure donou tsüchoda-a bumai louzü lesayu bue.

²¹Acheche mai hi veahoyu hai vepalai moe, ana mai ashimai louzü veahoyu nou phoua bu bailai.

²²Dayu mütai hai MAPAO nou ngaorae, ana puhvei chipao thaifüa vah souyu maiye sü puhnou jüpae.

²³Souzü süyu maili nou puhvei tsüdo hai pokhei khailouwe, ana vomai nou puhvei kaomoyu tsü hai sha-a laiwe.

²⁴Kounouyu mai linou maiye tukhasa-a hrülai, ana heakayu maina louzü mai qila soua bailai.

²⁵Dopfüyu hai nanou maiye soukhao baie, ana chi lako aveih linou puhye sousava peiwe.

²⁶Acheche maiwo puhvei samaitaoye kaozü hinou süthaisa-a tapeiwe, ana mai ashimai luduwo puletaoye süthaimah peia baiwe.

²⁷Hikei mai liwo puhnou phoua buyu nasü ngaoloulai moe, ana kounouyu mai linou muteiyu nangi ngaoloulai.

²⁸Checheyu maivei ludu hai hriyu nasüe, ana hashi souyu maivei ludu louzü athai sü baie.