Read Poumei Naga TSÜCHITAO 13 Bible Online

TSÜCHITAO 13 - Poumei Naga bible

TSÜCHITAO 13

¹Tsüveiyu nah linou puh puo vei paodou-apei sü keiwe, ana maiye ngaohiyu mailinou maichi kei moe.

²Mai aveih linou lah puh mü hinou paopayu rashithou aveih nasü toulai, ana shodo ashi souyu mai nawo louzü züvei-a buyu sü baie.

³Lah müye tukha louyu mai sü lahvei hrü hai vulouwe; chaochao soua chi paoyu maisü lahvei hrü hai souhaloua baie.

⁴Heakayu mai linou hataralia jüpasho-a buyuma, puhnou sünasü ngaoloukhai tilai moe. Kounouyu mai sü puletao nou jüpa-a buyu veishi hai ngaoloulai.

⁵Acheche mai linou dayu hai ngaorae, ana mai ashimai liwo haongu alia hashi hinou vah souwe.

⁶Acheche sünou chileeyu maili vei ludu sü khopeie, ana mah nanou mai ashi naye panou kaoduta-a baiwe.

⁷Mai kamai-a halia hayuma toungiyu khokho souwe; mai kukheli nou hayu khokho souwe, anou toungi shoa bue.

⁸Mai livei hrü hai hüpayu muh sü puhvei chingi-e, ana touhayu mai liwo po-a vupaloure halia hae.

⁹Acheche maili hai vavei shoyu ava ali büe, ana maishiyu maivei meivabvü louzü souhei bailai.

¹⁰Mai chi chouba-a rochiyu nasü khaityayu likhei baie, ana mainou paodou peiyu züyu mai hiwo tsüvei sü bue.

¹¹Thahaha-a ngaolouyu chingiwo hataha bailai, ana tititou nou pojükhai louyu mainawo pulailai palai.

¹²Areih vetemoyu thaio tsüle pepoa baiwe, ana jüpa souche louyu nawo ahri süübe lie.

¹³Paodou peiyu nasü ngaophou moyu puhsü lah pei hi hakayu pove louwe, ana kharochi tsükhou louyu mai sü buu ngaolai.

¹⁴Tsüvei maili vei doupeiyu hai ahri dzüla lie; kaozhou ashi hi loulaiyu phaki, sünanou nevei hrü hai vupa peilai.

¹⁵Tsüvei nanou maivei jüpa ngaoloue, ana mainou louchelou hoyu maina louzü haka tayu ludu hi tawe.

¹⁶Kaozü süyu mai nanou vah soutamo jünou tsü cholouwe, ana voyu mai linou lah puhvei voyu shapao-a baiwe.

¹⁷Kopola peiyu mai ashi nanou maikhe maiye panou veahoyu daowe, ana louchelou veiyu kijü pamai linou souvei louyu pfüve peiwe.

¹⁸Paodou peiyu chi pobayu maina sü touhayu ae hraongu ngao-a bailai, ana tudee peiyu chi keilouyu mai nasü tsükhou peiyu hai ngaolai.

¹⁹Jüpa vete louyu hai daizhou koute veisa! Ana voyu mai donou ashi hinou pah pfürei tabae.

²⁰Tsüvei maiye sa-a tayu mai sü tsüvei palai, ana vomaiye sa-a tayu mai louzü veahoyu vedao-a bailai.

²¹Rako ashi sünou mah souyu maiye thaihu-a laiwe, ana acheche maiye haveih nou buu peilai.

²²Mai aveih mainou puhvei tounah mai hi nangi khesü kaa khaidai peiwe, ana mah maili vei chingi sü acheche mai donou pojü khaipeia baie.

²³Touhayu mai linou vukhai touyu dei hinou thoudzü alao ngaolou süe, ana süsü kaozü moyu sünou phailai baiwe.

²⁴Süra nah hai to-e, ana mü nah-wo zü-a baiwe. (Lah nahye tudee moyu maisü, nahye leshi moe; ana nahye leshiyu maisü tudee peiwe.)

²⁵Acheche mai louzü toujü-sojü moe, ana mai ashimai liwo houzü-a bukoute bailai.