Read Poumei Naga TSÜCHITAO 15 Bible Online

TSÜCHITAO 15 - Poumei Naga bible

TSÜCHITAO 15

¹Veitou-a nou chila peiyu linou lekhayu sü soukhai peiwe, ana rarayu chipao linou lekha soupa peiwe.

²Tsüveimai linou chi paoyu phaki, puletao nou tsüdo sü panou veisho-a ngaowe, ana vomai müwo kaozü moyu chipao pao-a baiwe.

³MAPAO vei nghithou sü veishi hi zhuwe; ashi alia aveih teitei nou zhu poa bue.

⁴Chipao lako veiyu sünou ahri pove peiwe, ana chipao lako ashi nanou maivei tsüle souphe baiwe.

⁵Voyu maili hai puh puo nou paodou peiyu khesü ngaophou moe, ana tudee peiyu zülouyu mai nasü tsüveie.

⁶Acheche maivei ki hisü nangi alao bue, ana mai ashimai vei nangi sü veaho vedaoyu phaki souhakhai baiwe.

⁷Tsüdo aveih haisü tsüveiyu mainou polata peiwe, voyu mainou soumoe.

⁸Mai ashimai livei posheelayu hai MAPAO nou ngaora-e, ana mai veiyu livei veachi sü puhnou jüpae.

⁹Mai ashimai vei ludu sü MAPAO nou ngaorae, ana checheyu phoua laiyu maiye puhnou leshi-e.

¹⁰Kaomoyu vah souyu maisü tatei sho-a souvea peilai; deiapei ngaorayu maina sü thai-a bailai.

¹¹Thaimai buh hi koute-a MAPAO nou daibue touyu veishi sü ngaokhai touwe; süthaisü kabüa mai linou tsüchoyu khesü Ramai hinou pokulou khailaige?

¹²Maiye ngaohiyu mai liwo maiye panou souzü peinü moe; puletao hai tsüveiyu mai hinou kabülai touyu sü nouba-e.

¹³Maikhe mainou vasayu phaki nüwe, ana leveayu phaki zhu veimoe.

¹⁴Tsüsüyu mai livei tsüle haio tsüdoye phouwe, ana vomai li-o kaozümo nou tou-a laiwe.

¹⁵Veahoyu maili hai teisa nou tero koute-a bubaie, ana savayu maiwo tobai soumo-a khonüh nüwe.

¹⁶Touha-a buyuma MAPAO ye piyu hai nanou toungi-a veahoyu maina jünou veipu hie.

¹⁷Ngaorayu maiye koa touso veihli nou toua buyu jüo leshiyu maiye koa vupou nou toua buyu nou veipu hie.

¹⁸Lekha shimai linou radaipa peia züvei baiwe, ana shamea süyu mainou soukaona peiwe.

¹⁹Heakayu mai vei ludu sü shuhbe nou paohou loua baiwe, ana maicheyu mai vei ludu louzü ludu ka-e.

²⁰Tsüveiyu nahmai nou puoye sousa peiwe, ana voyu mai liwo puh pfüye ngaophou moe.

²¹Kaozü moyu hai tsühayu maina donou lesayu alie, ana tsüsüyu mai liwo cheche-a tawe.

²²Douzüapei mai hayu thaio choda-a buyu khesü mahta baiwe, ana paodou peiyu mai alao buyu thaio puhmai nou veiloulai.

²³Kaotou touyu chila ali hai mai li donou sashoyu lie, alia teile thaotouyu chipaosü daizhou koute veisa!

²⁴Tsüvei mai bo hai ahri hi tapo-a reikhewe, puhsü panou khekou thaimai buh hisü takoulai moe.

²⁵MAPAO nou khaophu souyu maina vei ki sü soushi peilai, ana mimeamai vei deirai hai vupeiwe.

²⁶Mai ashimai vei tsü hai MAPAO nou ngaorae, ana lesheeyu mai vei chipao sü Puhnou kei veie.

²⁷Zümo hinou dutou nüyu maina sü puh kikhahi veahoyu southoulou baiwe, ana seihla ngaorayu mai sü hriloulai.

²⁸Acheche mai liwo kabüa chila peilai tea tsüchowe, ana maishi mai livei mü louzü hashi laapa baiwe,

²⁹Mai aveih maivei veachi sü MAPAOnou kei peiwe, ana maishi maivei louzü pomoe.

³⁰Nghithou hi ava nanou lethouye sousa peiwe, ae ko veih nou souraoye sou hriva toupeiwe.

³¹Souzüre donou deipeiyu kei louyu maina sü tsüveie.

³²Paodou-apei loubayu mai nasü lahye soushiloua baie, ana tudeiapei keilouyu mai nasü tsüsü ngaopu loulai.

³³MAPAO ye piyu hai ratsü vei doupeiyu alie, alia tainou souyu hai tsükhouyu jünou rai-a tawe.