Read Poumei Naga TSÜCHITAO 17 Bible Online

TSÜCHITAO 17 - Poumei Naga bible

TSÜCHITAO 17

¹Züvei-a buyu ki li hinou khonüh nüa buyu jüolouzü kaonaphi teanou khoto müsha ali touyu nou veipu hie.

²Tsüveiyu qila mai linou hraongu vah soua laiyu puhvei paopu nah peinou tukha soulai; alia puhnou chinamai ali büa kaathao zholoulai.

³Shahu alia sana hai meinou dei-a zhuwe, alia maivei tsüle hai MAPAO nou zhuwe.

⁴Vah ashi souyu maisü maishiyu mai chi keiwe; alia dayu maisü shodo ashi soumai vei chi keiwe.

⁵Touhayu maiye konüyu maisü puletaoye soupeiyu Ramai ye ngaohei-a baie; mai linou veahoyu vedaoyu phaki lesayu maiye sü tudee vuzülai.

⁶Tyaomaitao hai paipaoh maivei peirüe, alia nahmai vei kathe sü puletao vei puo maitao-e.

⁷Tsükhoulou veiyu mainou dachi paocha moe, ae vomai nou koyu chi lia pao chamoe.

⁸Seihla pei-a buyu nanou sünasü kheikhupa chuh ali büa louchewe, puhnou buliki veyuma veisodu soulouwe.

⁹Maikhe maiye panou neye jüpa-a leshi nülouzü, puletao nou soumah khaitouyu khesü khaipeio. Mainou soumah khaitouyu khesü licho-a bukou teyu hai samai khamaiye soukho-a baiwe.

¹⁰Tsüsü mai hi bakha ali züpeiyu nanou vomai li hi bakha kaihli dapeiyu jünou veipu hie.

¹¹Tobai soumoa souvea souroyu mai shimai hisü zhaipou shiyu kopomai ali büa athai sünou puletao hi velai.

¹²Vomai linou puhvei kaozümo soua daore jüwo puhye panou vuh toutu shaolouyu vuhkü ye nou daobaio.

¹³Mai linou haveih soupeiyu thaosü hashi nou khapei louzü, ashi sünou puh ki hinou talaikhai tilai moe.

¹⁴Züvei parai hiwo dzü dekhai touyu zaibvü hinou dzü tsütayu büa baie; südonou züva pamo jünou tavai lou-a baio.

¹⁵Mai ashimai ye panou talouyu moa acheche maiye paoshi peiyu mai ahai khinou MAPAO nou raibüa ngaorae.

¹⁶Tsüsüyu lia ha-a bulukhu daidonou vomai li bah hisü tsüvei hrüloure vei muh bukhai laige?

¹⁷Samai liye teisa nou leshi-a baiwe, ae thaihou china mai liwo veahoyu phaki babou khare donou bue.

¹⁸Tsü hayu mai linou chaachou souwe, ae kinapamai nghoujü nou maivei müpfü peia baiwe.

¹⁹Chohla tanüyu mai nasü züveiyu jüpae; kikhu souku payu mai nasü haka tayu phouwe.

²⁰Kheirei tsüpfüyu mai lisü dusopa laimoe, alia kaozü moyu müli pfüyu mai sü veayu hi delou bailai.

²¹Tsühayu nah ali hai puo vei leveayu sü baie; alia avomai li vei puo sü lesayu hae.

²²Savayu lüthou lisü pou aveih lie, ana levea koutea buyu hio sososoua southayu nasü baie.

²³Maishi mai liwo seihla peiyu polou-a zü nasü soumah peia baiwe.

²⁴Tsüsüyu mai linou puh pahsü tsüvei hilo pfüreiwe, ana vomai vei nghithouwo deiphao akhai hi zhua baiwe.

²⁵Voyu nah liwo puh puo le souvea peiwe, alia puhye napeiyu pfüye panou dongai pfüa baiwe.

²⁶Acheche mai hi zhotouyu hai veimoe; dusomai liye süüda nou dayu hai mah-e.

²⁷Lah vei chipao tukha louyu maisü tsüdo bue, alia tsüle kaonayu maisü tsüsüyu mai-e.

²⁸Vomai li koute-a raokhai timoa buyu thaio puhsü tsüveiyu mai pha-e tea chopeia bailai.