Read Poumei Naga TSÜCHITAO 18 Bible Online

TSÜCHITAO 18 - Poumei Naga bible

TSÜCHITAO 18

¹Maiye koa hrüzholou sümoyu mai lisü lah puh jüpa likhei phouta-a baiwe; mai hrülai nou kaore tea buyuma puletao hai aetou moe.

²Voyu mai linou tsüsüyu hinou savayu sü hae, ana lah puhvei tsüchoyu nasü paopa loure donou likhei te-a baiwe.

³Hashi alia mah sü koa tazhowe. Nevei khekai hare touyu thaisü, ne hraongu sü ngao-a bailai.

⁴Mai livei chipao sü thoushoa buyu dzü, veisho-a kütayu reitou ali büa ratsü sü bulou veie.

⁵Mai ashimai liye souku peiyu hai veimoe, moa achechemai liye panou züna ngaomoyu hai kaomoe.

⁶Vomai livei mütai nou züveiyu pove peiwe, alia puh mü nou süra dapeiyu khowe.

⁷Vomai livei mü hai puhvei hakayu baie, ae puh mütai hai puhye donou rüh baie.

⁸Kheichi paomai livei chipao hai touvei shoyu touso ali büa baie; sütao nou vasou khevai louta-a baiwe.

⁹Heakayu maili hai soukanghi peiyu mai bütoua baie.

¹⁰MAPAO vei zhih hai khoushoyu reihbu alie, acheche mainou sühi tuvelou-a zhouvei ngaolouwe.

¹¹Toungi mai chingi sü puhvei khouyu nuhdue, ae kuyu kivo ali büa puhye vupeiwe.

¹²Hakatayu vemojüo mai li le hai maiye ngaohia baiwe, ana tainou souyu nawo tsükhou peiyu jünou ra-a tawe.

¹³Chila peimo jünou mai chi sü keitou louraio, sübüa soulou moyu thaio, süsü lah nevei voyu alia hraongu baie.

¹⁴Mailinou sounouyu shamea lousüe, ana thaonou le pepoyu sü mealoulai?

¹⁵Tsüveiyu mai linou tsüdo pojü louwe, alia tsüveio nou tsüdoye phouwe.

¹⁶Mai livei sapeina nou puhye donou buh soukhai peiwe, alia puhye adusomai nghoujü hi save peiwe.

¹⁷Chi-lou kuyu phaki, puhvei zü rai-a paoyu nanou kaoyu büa baiwe, mai kukhe navei zü tave paomo jüwo.

¹⁸Khouko bushoyu mai ahai vei chi-lou kuyu phaki, rako dazhuyu nanou züveiyu hai akhai soupeiwe.

¹⁹Thaihou jürai maivei soukha peiyu haio khoushoyu nuhdu ali büe, ana züveiyuwo ki aduli hinou kivo khaku khaitouyu büa baie.

²⁰Puh mü vei rashithou nanou mai lisü rukha loulai; puhvei mütai vanou shipeiyu thou sünou puhsü toulai.

²¹Athai ae ahri sü nevei mali khouko hi bue, alia sünaye leshiyu maisü süna vei thou toulai.

²²Maipfü ngaolouyu mai nasü havei li ngaoloure, alia MAPAO hinou puhvei jüpa sü ngaoloure.

²³Touha mai nasü ra-a khowe, ana toungi mai nanou chi-la shi-a chila pei baiwe.

²⁴Samai kamaio khaokhao tisou-a samai soua baiwe, ana samai kamaio thaihou jüraimai jünoua hei-a thaoyu bue.