Read Poumei Naga TSÜCHITAO 19 Bible Online

TSÜCHITAO 19 - Poumei Naga bible

TSÜCHITAO 19

¹Kaozü moyu chipao-a ae vo-a laiyu maina jüwo louzü chilee chechea touhayu mai lia veipu hie.

²Mai linou tsüdo ha-a buyu hai veimoe, alia tharara-a tayu mai nanou ludu tamah baiwe.

³Mai linou züdou moyu soupfüa haka tayu phaki, puhnou rapa-a MAPAO pei hi paodu-a bubaiwe.

⁴Nangi sünou samai ashu taoli save peiwe, ana touhayu mai liye samai khamai nou thaowua baiwe.

⁵Chikuyu buh hi da-a lah-apei mai nasü souvea peimoa pa talai moe, alia da-a chi paoyu mai nasü turei palou hoe.

⁶Mai hrülai nou lelah veiyu maina jüpa phouwe, alia mai hrülai nou maiye sapeina peisüyu naye samai sounüe.

⁷Touhayu mai naye thaihou jüraimai hrülai nou puhye ngaora-a baiwe; daizhou koute puhvei samaitao nou puh hinou hrotalai! Puhnou chipao lako aveih nou jüa thaihuyuma, puletaoye seilou moe.

⁸Tsüvei ngaolouyu mai nasü lahye leshiwe; tsüsü khailouyu mai nasü duso palai.

⁹Da-a la-apei nasü souvea peimoa panou talai moe, alia dachi paoyu maisü hakata-a bailai.

¹⁰Vomai linou vasho-a hrüyu hai thao moe, alia kilai mai linou adusomai pei hi pa tukha souyu hai zhai moe.

¹¹Tsüveiyu maili-o sososoua lekha baiwe. Mai linou puh hi soumah peiyu phaki, sünaye khaipeiyu hai veikayu nasüe.

¹²Vemai livei lekha hai chipeikhaoduo nou rayu büe, ana puhvei jüpa louzü pounghou pei hi vidzü koupeiyu büe.

¹³Voyu nahli hai pfüpuo donou soukanghi peiyu baie, alia chapfü shiyu-o ki zhaoyu büa baie.

¹⁴Ki alia chingi hai pfüpuo hinou kaathao loue, ana tsüsüyu chapfü louzü MAPAO likhei nou peiloua bailai.

¹⁵Heaka nülouzü puhye panou heakha theo; zhinü louzü panou zhiwo, ana puhsü pouzüa bailai.

¹⁶Ramai vei chikha zü louyu maisü hrü sholai; sünaye ngaophou moyu mai sü thai-a bailai.

¹⁷Touhayu maiye zhuvea poupaoh peiyu hai MAPAO hi poupaoh peiyu raibüa baie, MAPAO nou puhye sü peidakhai-a bailai.

¹⁸Nahle-a bukinou ae doulousüa bukinou ne nahye tukhalo; nenou sübüa soulou moyu thaio, ne nahye panou shitare donou ne sü puhye soukha peia baie.

¹⁹Lekha shishoyu mai nasü puhye panou ngaozü nasü ngaolou theo; nenou puhye phapei louzü haithaia ne sü soupua bailai.

²⁰Paongao peiyu keilo ae paodou-apei polouo, sükulouzü haithai ne sü tsüvei loulai.

²¹Mai ali vei tsü hisü chodayu hai alao bue, ana MAPAO vei leli thaifüa soushu paloua bailai.

²²Mai linou souzüyu hai chilee chechea hrüyu nasü baie, dayu maili jüo touhayu mai-a veipu hie.

²³MAPAO ye piyu nanou ahri hi süthai save peie; süna buyu mai sü vaphi tea soyu ngaolouwe; puh sü veayu vedaolai moe.

²⁴Mai kamai-a heaka leyu donou touso koutea lah mü hi pokhe thounü moe.

²⁵Maiye ngaoheiyu maiye dapeio, sütou louzü chaome souyu mai-a souzü nasü douloulai. Tsüsü mailiye souzü peio, sütou louzü puhnou tsüdo ngaopu loulai.

²⁶Puoye souchoroyu ae lah pfüye hulaiyu mai nasü hrao soupeiyu alia souzüh-vei peiyu nah ali baie.

²⁷Anahna, nenou paodou peiyu sü keibare touyu thaio, ne sü tsüdo vei chipao hinou tarei tare.

²⁸Muh lia hayu lah-apei mai linou zü naye konüwe, alia mai shimai navei mü nou ashi touwe.

²⁹Maiye ngaohiyu mai naye donou mah paodu peire donou souda chewure, alia vomai liye dapeire donou soudawure.