Read Poumei Naga TSÜCHITAO 20 Bible Online

TSÜCHITAO 20 - Poumei Naga bible

TSÜCHITAO 20

¹Zhaoh hai havei nya moe, zhoah sokhai-e maiye züva-a baiwe; südonou mai talia sünaye panou süthaimah peiyu mai sü tsü veimoe.

²Veo vei ngaopi shoyu lekha rarou nasü kipeikhaodu livei raah büe; puhye rasou payu mai nasü lah puhvei hrü hai souhaloua baie.

³Züveiyu hinou tavai talouyu maisü tsükhou louveie; ana vomai louzü züva-a bubailai.

⁴Heakayu mai nanou tahtayu teile hinou tathoulou moyu puhsü chaki halia chachi loulai moe.

⁵Mai livei tsüle hisü tsü hai thoushoyu dzübvü hinou dzü buyu raibüe, ana tsüvei mai linou süsü paipa loua bailai.

⁶Mai alao soumoa nou lah kukuvei veiyu ae chileeyu sü sha-a paowe, ana thao nou louchelou veiyu maiye ngaolou süe?

⁷Tsüle sheesha touyu ae kaozü vah souyu pou buyu nahmaitao hai daizhou koute rako veisa!

⁸Vemai linou chikuyu buh hinou buyu phaki puhnou veiyu shiyu teitei ngaokhai tilouwe.

⁹Thaonou “Avei tsüle-o soushee loure; Ewo mah hinou sheeshare” tea paolou süge?

¹⁰Sühdou mahyu alia kacho doumahyu ahai kheinou raibüa MAPAO nou ngaorae.

¹¹Nahmaitou koutea puh vah hinou puhnou souyu sü shilouwe; alia puh hai kao-e ae chechewe touyu sü sülouwe.

¹²Chouyu nyou alia ngaoyu nghithou, sühai kheinou MAPAO nou soupeie.

¹³Zü-zhiyu ye leshawuso, ne touha shulai; ne nghithou hrüpalo, sütou louzü ne tounghi-a bailai.

¹⁴“Haire shie, taire shie,” tea na hrüyu nanou paoe; ana puhnou tayu thainou, khaosou khaiwe.

¹⁵Sana bue, alia muhtei chuh-a alao bue; ana tsüdo veiyu mai mütai-a muteipu hie.

¹⁶Mai ali vei sabanü polo, puhnou shimomai livei müpfü peiyu phaki, alia puhye chaa hinou mukhailo puhnou vakoumai donou müpfü peiyu phaki.

¹⁷Tsüle sheemoa ngaolouyu nasü chuo nenou touvei shoyu touso ali büa toua malae, ana nakouwo ne mü hai chuhsa touyu büa bailai.

¹⁸Tsüchoda taohai douzüapei nou soushu peiwe; tsüvei-a süthaiapei nou koa reih soupeiwe.

¹⁹Maiko paoshi-a laimai nou kheichi pophao peiwe; südonou chaochao soua chipao-a laiyu mai liye koa tasouo.

²⁰Pfüpou maiye chaayu maisü puhye sü meivabvü souhei loua zhiteiyu buh khaiyu büa khai-a bailai.

²¹Talabou-a ngaolouyu nangi sü neye donou haveih lia soupeilai moe.

²²“Enou ashina ye paohkha peilai” tea paoso, MAPAO vei vu kholo, sütoulouzü Puhnou neye soukha peilai.

²³Tsüle sheemoa sühdou peiyu ae kaomoa kacho doupeiyu maiye sü MAPAO nou ngaora-e.

²⁴Mai livei phika sü MAPAO nou lüpei-a baie; süthaisü daibüa mai linou puh ludu sü sükulou khailaige?

²⁵Ramai hi posheela peilai tea chaachou soumo jünou rai-a tsücho toulou raio, sükumo louzü ne sü lengai-a bailai.

²⁶Tsüveiyu vemai linou soumah khaitouyu maitaoye sü phoupaloua bailai, ae puhnou zhuveayu ha-a tudei pei-a bailai.

²⁷Mai alivei rako hai MAPAO vei meivabvü baie, puhvei lekhe teitei po-a nou phoulou baiwe.

²⁸Chi züyu ae louchelou veiyu sünou veo yesü pokhai peiwe, alia puhvei vebuh sü acheche nou pfülapa peiwe.

²⁹Nahle maivei savayu ae veiyu hai puhmai vei pfüchi-e, ana tsümai livei hüveiyu haiwo puhmai vei peipao-e.

³⁰Zhime dapa peiyu bahkha nou ashi ye polai peiwe; hekhokho peiyu nanou vasou khevai loute soushee peiwe.