Read Poumei Naga TSÜCHITAO 23 Bible Online

TSÜCHITAO 23 - Poumei Naga bible

TSÜCHITAO 23

¹Nenou aduso mailiye koa toulai tea buyuki, ne nghoujü hi dai bue touyu zhutou louo.

²Ne hai tonghou shiyu mai alie toulouzü soutaosoua lah neye tukhalo.

³Nenou puhvei touveiyu touso nasü jüpa shosouo, daiolouzü sünanou neye soushi peilou veie.

⁴Chingi ngaoloure donou teroua vah soula lesouo; phibah khailoure donou tsüvei cholo.

⁵Nevei nangi khesü mei keipha touyu ali hinou hatalou veie, süna hai sükhaimoa shouh pfülou-a lüche büa tei hi zhaokhe ta-a bailai.

⁶Toteiyu mai livei raokhao tousouo; puhvei touveiyu natao sü jüpaso.

⁷“Talou toupulo” tea puhnou ne hisü paowe, ana puh lekhe hisü sübümoe. Puh sü puhnou tsücho-a buyu nasü baie.

⁸Nenou touthou khaitouyu khesü rüpawu bailai, alia nevei chipao lako aveih khesü hamako bailai.

⁹Vomai ali hi chipao aveih paore donou tesouo; daiolouzü puhnou nevei tsüchitao sü ngaophoulai moe.

¹⁰Puopao maivei deirai chuh polaiso, moa pfüpuo hayu maivei deirai taisouo.

¹¹Daiolouzü puletaoye Vupa-apeio nasü khoushoe; Puhnou puletao donou neletaoye dulai.

¹²Paodou-apeio vei chipao khesü soutaosoua keilo, alia nenou tsüdo chipao khesü doulou süyu koute doulo.

¹³Nahmai aliye tukha nümoyu sü sousouo; nenou puhye süra nou dayuma puhsü thailai moe.

¹⁴Nenou puhye süra nou dapei louzü, nenou puhye rabedushao hinou puhvei hrü hai vupaloulai.

¹⁵Anahna, nenou tsüvei louzü, Esü savalai.

¹⁶Nenou tsüsü chipao paolouzü, Esü lesa sholai.

¹⁷Mah souyu maiye thainü souo; ana newo MAPAO ye piyu hinou teithetsü lichopoa hrülo.

¹⁸Cheche vuzünou sühisü thaikhai veilai, alia nevei areih nasü soude laihwulai moe.

¹⁹Keilo, anahna, alia tsüveilo, alia nevei tsüle hai nenou hrüpfüa tayu ludu nasü soutaosoua cholouo.

²⁰Zhaoh sozhiyu mai hrohi moa tohou shiyu maitao hrohi busouo;

²¹Daiolouzü sozhiyu mai alia tohou shiyu mai sü touha-a bailai, alia pfünüyu nanou mai liye sahhea nou banou peia bailai.

²²Neye napeiyu ne puo pai keilo, alia ne pfü tsüpayu phaki, puhye ngaophou moyu souso.

²³Acheche nasü hülo, ae sünasü zolaiso; tsüvei, paodou-apei, alia tsüsü taosü hülouo.

²⁴Acheche mai livei puo sü lesa sholai, nah tsüvei ali nalou nasü puh hinou sayu soulai.

²⁵Ne pfüpuoye panou ne vanou khaophu soulo, alia ne pfüye panou lesalo.

²⁶Anahna, nevei tsüle sü Eye peio, ae nevei nghithou sü avei ludu sü zhulo.

²⁷Khakhapfü ae chilee moyu naotumai hai thailou veiyu rüh baie.

²⁸Honapai nou maivei shaomai büa dazüa khowe alia mai taoliye sü soumah peiwure.

²⁹Thaomai nou dopfüwe? Thaomai nou leveage? Thaomai nou pepo-a bue? Thaomai nou nolealea-a chi pao-a buwe? Thaomai nou nghithou homara-a buge?

³⁰Teile poulao zhaoh sozhi-a laiyu maitao, zhaoh lathou hrüloua solai tea buyu maitao-e.

³¹Zhaoh hai homara-a buyu phaki, pai hinou reipha phayu ki alia lavü kouyu phaki zhaoh sü zhuso.

³²Akhai hisü sünanou nghou büa daolai, alia laih büa keipei-a bailai.

³³Ne nghithou sü sheemoyu na ngaopalai, alia ne sü kaomoyu chi paopalai.

³⁴Ne sü zai touchü hinou soubu soua dazüyu mai li büa bailai, dzüluki vei haosah deka peinou pa züyu mai li büa bailai.

³⁵“Puletao nou Eye da-a phare,” tea nenou paolai, “Eye mainou da-a phare, ana Enou sülou more. Daisounou E hai kushulou hodesa? E zhaoh pai kukhe li phoutalai.”