Read Poumei Naga TSÜCHITAO 24 Bible Online

TSÜCHITAO 24 - Poumei Naga bible

TSÜCHITAO 24

¹Mai ashi maiye thainüso, moa puletao ye koa bunüso.

²Daiolouzü puletao vei tsüle hio shodo ashi phou-a baiwe, alia puletao nou mü hepayu chüsü maiye soushi peia baiwe.

³Ratsü nou ki sü soulouwe, alia tsüsüyu nou süsü soushu palouwe.

⁴Tsüdo nou muteihyu alia veishoyu chingi taonou poh-a kide taosü phoulouwe.

⁵Tsüveiyu mai li hai khouko bumaili jünou veipu hie, alia tsüdo buyu maili hai pfüchi bumai jünou kopu hie.

⁶Daiolouzü tsüveiyu süthaiapei vanou ne reih soulou süe, alia paodou-apei mai alao bulouzü reih sü veilouyu bue.

⁷Ratsü hai vomai donou süloure hai tateih sho-e. Puletao nou tateiyu chi phayu phaki, chi lia paolou hoe.

⁸Hashi soure donou tsüchoda-a bukou teyu mai nasü vahshi soupuna tea kulai.

⁹Kaozümo do phouyu hai mah-e, alia maiye ngaoheiyu nasü mainou ngaora-a bailai.

¹⁰Rako shiyu teithe zhou ne zhai shitayu thaio, nevei pfüchi tousü titya baie.

¹¹Southalai tea satayu maiye sü taho vupa peio; dathayu buh hinou hralou-a delou laiyu mai sü nükhai papeio.

¹²Nenou haisü nevei vah moe tea pao-a mala-e, ana Ramai nou nevei tsüle sü süwe ae neye chikulai. Puhnou neye süwe ae neye zhua nou bue. Alia puhnou neye nenou soupfü khaitouyu vah thaifüa buu peilai.

¹³Anahna, laivoudzü toukhaio, daiolouzü haisü veie, alia laivoudzü pho hinou zaokouyu hai touvei shoe.

¹⁴Ratsü hai nevei hrü donou sübütoue; nenou süsü ngaolouyu thaisü haithai donou ne hi areih sü bue, ae nevei areih sünasü soudewu laimoe.

¹⁵Acheche maivei kibu soushire donou mai ashimai büa dazüa kho-a busouo, puh ki hisü zhaipou shitya souso.

¹⁶Daiolouzü acheche mai liwo bakha anai koute kaodu tayuma lashu loua baiwe; ana mai ashimai louzü veahoyu veyu phaki hakata-a bailai.

¹⁷Neye ngaobayu mainou kaodu tayu phaki asah souso, alia puhnou phi hralouyu phaki ne lesaso;

¹⁸molouzü MAPAO nou ngaoloua ne hi vamoyu soushulai, alia puh hinou puhvei lekha nasü pfürei tashulai.

¹⁹Hashi soumai donou ne pikhai tisouo, alia mai ashi maiye thainüso;

²⁰daiolouzü mai ashi maisü thaikhai hi halia hae, mai ashimai vei meivabvü sü souhei bailai.

²¹Anahna, MAPAO ye alia vemaiye tsükhoulo. Puhaiye khaityayu maiye sü koa vah souzhoso;

²²sükuyu maiye hisü hakatayu hai thashoa velu veie. Ramai nou moa vemai nou kabüa soushi peishulai touyu sü ne sülou süvu?

²³Haitao-a tsüvei mainou paoyu chipaoe: Chikuyu hi soukuyu hai veimoe.

²⁴Mai ashimai na hi “Ne mah hae” tea paoyu nasü, maikhe mainou chaalai, alia tyahrütao nou ngaoralai;

²⁵ana mai ashi maiye züpeiyu maisü savayu ngaolai, alia hra aveih khesü puletao hi bulai.

²⁶Tsüle sheesha tea nou chila peiyu hai cheche-a sapokha souwe touyu vei shee alie.

²⁷Nenou dou sü souda loumojü ae kabüa ne hriloulai touyu khesü souda loumojü, ne ki sü souso.

²⁸Kaomoa nou ne kinapa maiye dashaki soupeiso, alia maiye süthaimah peire chipao sü paoso.

²⁹Haibüa paoso, “Puhnou ahi soupeiyu büa E-a puh hi soupeilai; puhnou ahi souyu na thaifüa Enou puh pao khapeilai.”

³⁰Enou shakawo vei doupe hi tachokoue, tsühayu maili vei darkha kipei pe hi tapoa koue;

³¹alia zhukhaio, sühisü rai-shuh nou chüpa bouchü loure; alia dei sü ngubetao nou pa phouloure, alia sünavei chuh nou kivo khokhai touyu khesü pesasa tare.

³²Süthaisü Enou ngaoloua tsüchoe; Enou zhuloua paodou peiyu khesü süloue.

³³Dazü kholoulai hie, zhikho touloulai hie, bah khyapoa sokho touloulai hie tea bulouzü,

³⁴touha sohayu nou haolai mai ali büa ne hisü ve-a bailai, alia nevei jüpa nou reihmai ali büa velai.