Read Poumei Naga TSÜCHITAO 25 Bible Online

TSÜCHITAO 25 - Poumei Naga bible

TSÜCHITAO 25

¹Haitao-a Solomon vei tsüchitaoe, Judah hi Veo Hezekiah vei larü rüyu maitao nou rükhai toue.

²Pokukhai touyu nasü Ramai vei khouko ava nasüe, ana vemai kathe louzü popa ngaopeiyu nasü noue.

³Tei nou kuyu büa ae zaidzü nou thouyu büa vemai vei tsüle hai phoupa louhoe.

⁴Shahu hinou komoyu hubatao polaiwuo, sütaosü hukupu donou likhao soululai.

⁵Mai ashimai hai vemai nghoujü hinou hulaiwo, sütoulouzü puhvei vebuh sü acheche hinou soushu loulai.

⁶Ne lah vemai nghoujü hi talou lasouo, moa adumai buh hi pa lasouo.

⁷Daiolouzü nevei buh nasü ne jünou veipuyu mai ali hi peio tea paoyu jünou neye buh haina tapa polo tea paoyu nanou veipu hie.

⁸Nenou ngaoyu nasü thalasou chikubu hi popaha tisouo; daiolouzü akhai hi ne kinapa mainou neye hrao soupeiyu phaki ne daisoulai?

⁹Kinapa maiye vamoyu bulouzü, ne hai lah vamoyu nasü phaloua baio, maivei kheichi sü vakou paopa phaoso.

¹⁰Sükumo louzü mai hrülai nou neye kheichi pokulou sümoyu mai ali baie tea paoshulai, alia ne sü hraongu pfüa ne zhih shiyu sü akhai halai.

¹¹Thaohsho-a chipao li paoyu hai sana nou souyu phoshi ali shahu khao hi thoukhai touyu büe.

¹²Tsüvei shoyu mai linou paopiyu hai kei louyu mai lisü veikayu sana nou soukhai touyu bahkha moa zhusana jünou veipu hie.

¹³Louchelou veiyu kopomai ali hai puhye seita peiyu maitao donou chachiyu phaki, kaoshoyu vürah dzü büa souhrivaa peiwe.

¹⁴Peilai tea paohkhai toua peimoyu mai nasü, teirü pfümoyu teihao moa teikhei büa baie.

¹⁵Shamea süyu poa vemai liye taih lousüe, alia chilako aveih linou sourao koutea souphe peilou süe.

¹⁶Nenou laivoudzü ngaolouzü, ne lah tou thao toulou-a baio; toupoule louzü ne sü rüpa-a bailai.

¹⁷Ne kinapa mai ki hi talaiho buba leso, molouzü puhnou neye sa-a choshulai ae neye ngaorata shulai.

¹⁸Lah kinapa hi da-a lah-apei mai lisü thailou veiyu reih basei, süübou moa khoche, moa vouloushuh büa baie.

¹⁹Lühayu mai liye veahoyu teile hi loucheyu hai hu shiyu moa shovaiyu mai li büa baie.

²⁰Leveayu maili hi lou sou peiyu hai tei kaoyu teile hi na phapeiyu büa baie, alia vazhimü hi tai napeiyu büa baie.

²¹Neye ngaobayu mai nanou hroua bulouzü, puhye khaoto patoulo; alia puhnou rei louzü, puh ye dzü pei-a pa kelouo.

²²Sükulouzü puh pei hi meithou khaipeiyu büa bailai, alia MAPAO nou neye buu peilai.

²³Reilova vei teikhai nou teirü pfüve peiyu büa mai thailo nou maichi paoshiyu mai sü lekha rarou pfüve peiwe.

²⁴Züvei süyu naotu liye koa ki ali hinou bure jüwo ki shatouli hinou hrüyu nou veipu hie.

²⁵Kadou kounou ko aveih chouyu haisü, rei shoyu phaki dzükao paili keyu bütoue.

²⁶Acheche mai linou mai ashimai liye lou zho-a bo phou peiyu hai kühyu dzünghou moa sheemoyu dzüla li büa baie.

²⁷Laivoudzü alao touyu hai veimoe, südonou shohpeiyu chipao hai lailo.

²⁸Lahnou lahye tukhalou hoyu mai lisü pepotayu alia kaoro lia ha-a buyu nuhdu büa baie.