Read Poumei Naga TSÜCHITAO 27 Bible Online

TSÜCHITAO 27 - Poumei Naga bible

TSÜCHITAO 27

¹Dosho donou khaophu souso, daiolouzü dosho teithe dai-e vepalaisa touyu sü ne sümoe.

²Ne lah neye paosho moa mai kukhe liye moyuma vakoumai liye panou paosho-a baio.

³Chuh ali hai süh bue, vünai hai süwe, ana vomai linou lekha soupa peiyuo sühai jünou süpu hie.

⁴Rarou lekha payu hai zhaipou shisho-e; ana thaonou ngaoraiyu nghoujü hinou lalou süge?

⁵Dua nou züpeiyu nanou kheikhei soua leshi peiyu najünou veipu hie.

⁶Samai khamai nou zhizhu peiyuo veie; ana ngaobamai linou neye phaovoyu shodo ashi soulou veie, sünasü zhutou toulo!

⁷Pou phouyu mai nanou laivoudzüa thainülai moe, ana houa laiyu mai liwo khayu touso koutea touveisho-a bailai.

⁸Mailinou puh ki hinou tapayu hai raohou linou puh phe hinou tapayu büa baie.

⁹Theadzü alia poukai nüveidzü nou mai liye souva peiwe, ana veayu linou tsüle souphe peiwe.

¹⁰Nevei samai moyuma ne puo vei samai khamaiye ngaisouo. Nenou veahoyu teithe, ne thaihou-jürai mai ki hi hosouo. Hoshoa buyu nevei kityarai mai jünou nghiki nou buyu ne kinapa mai-a veipu hie.

¹¹Tsüveilo anahna, alia ale sousava peio; sükulouzü mainou Eye paoshiyu phaki puletao hi Enou chila peilou bailai.

¹²Kaiyu mai linou kaozhou ashi zhingaoloua tarei talouwe; ana chaome souwo louzü sühi tapokou veahoyu dao-a baiwe.

¹³Shimoyu maili vei müpfü lailouzü, puhvei sabanü sü pokhailo, alia mai linou vakou maivei müpfü peilai toulouzü puh hi hanali nou poa chaachou soukhailo.

¹⁴Mai linou shohna nou kushu zhiloua puh kinapa maiye ha peiyu louzü chaa ali bübaie.

¹⁵Teirüyu phaki thaomoa dzü zhaotatayu ali hai züvei süyu naotuli sü raibüa baie.

¹⁶Honapaiye tukhayu hai teikhaiye nuchaolai tea teyu büa baie, mokhaia puh bah hinou theadzü polaiyu büa baie.

¹⁷Hu linou ali hinou hei thaiwe, alia mai linou mai ali hinou doulouwe.

¹⁸Doube koyu mai nanou süna vei rashithou sü toulai, alia kilai mai linou puhvei paopu ye kikotou peiyu nasü tsükhou peiyu ngaolai.

¹⁹Dzü hinou lah zhu ngaolouyu büa maili vei tsüle nou maiye pongao peiwe.

²⁰Athai maivei deiphao ae mai livei jüpayu hai raibüa baie, sühai hisü rukhayu akhai hae.

²¹Shahu alia sana hai mei nou dei zhuwe; alia maiye sü puhye paosho peiyu sünou poa zhuwe.

²²Vomai liye daposhu thainono khaitouyuma puhvei voyu nasü puh hinou halai moe.

²³Nenou soulou süyu koute soutaosoua nevei kikhaorü sü zhutou tilo,

²⁴daiolouzü nangi hai teisa nou bulai moe, alia vepeirü hai-a khaphao teitei hi bukou telou moe.

²⁵Poudai sailouyu thai, ashu nou lapa-a baiwe, alia deichitao phi hisü holou baiwe,

²⁶zhaotu mainou poa sabanü soulai, alia nghitutao nou dou livei muh peilai.

²⁷Nghitu kukhetao nou neye donou ae nevei kikha mai alia naotu kilai maitao donou naodzü peia kiko peilue.