Read Poumei Naga TSÜCHITAO 28 Bible Online

TSÜCHITAO 28 - Poumei Naga bible

TSÜCHITAO 28

¹Mai nou thaihu moyuma mai ashi maiwo tuta-a baiwe, ana achechemai louzü kipeikhaoduo büa khuveie.

²Teidei linou kaozü moyu mah soukhaie, süthai-apeimai alao pa-a baiwe; ana teidei sühi süthai-apei maitao hai tsüsüyu ae tsüdo buyu thaio, teile sosho-a kaona-a buloulai.

³Khouko buyu mai linou touhamai liye souveayu haiwo teikhai teirü ashi nou routhou hüraiyu büa baie.

⁴Chikha ye ngaophou moyu mai nasü mai ashi maiye paosho-a baie; ana chikha züyu maitao louzü puletaoye duwe.

⁵Maishi mainou kaozü nasü sülou moe, ana MAPAO ye thoyu mainou sünasü sütou toulouwe.

⁶Tsüle sheesha teanou touhayu mai nanou kaozümo soua toungiyu maina jünou veipu hie.

⁷Chikha züyu nahlemai nasü tsüvei-e, ana thoulou moyu maiye samai souyu nah linou puoye hrao soupeiwe.

⁸Pousha vea souloua toungi louyu mai vei nangi khesü, touhayu maiye zhuvea peilaiyu maina donou pojü khaipeia baie.

⁹Chikha zümoyu mai linou veachi paoyu hai, Ramai nou puhvei veachi sü keira sho-a bailai.

¹⁰Maicheyu maiye süthai poa ashi hi thoupeiyu puhsü lah vei kaobvü hi deloua bailai. Mah hayu mainawo louzü veishoyu buu peilai.

¹¹Toungi maiwo lahnou lahye tsüveiwe tea cho-a baiwe, ana tsüsüyu touhamai nanou puh jünou süpu hie.

¹²Acheche mailinou reih veilou khaie, sühisü dushoa savayu bue; ana mai ashi nanou dusopa khaie, maikhemai sü tutsüta-a baiwe.

¹³Lah vei mahtao pokuyu puh sü duso palai moe, ana mah lawu-a vah ashi khesü thaokhaiyu mai sü zhuvea ngaoloulai.

¹⁴Teisa nou MAPAO ye piyu mai nasü sava-a hrüloulai, ana le khouyu puh sü veahoyu hi deloua bailai.

¹⁵Mai ashi mai linou nuh teidei khoyu phaki, touhayu maiye donou kipeikhaodu nou rayu moa khushoyu vuhkü ali büa baie.

¹⁶Tsüsü hayu tukha soumai lisü zhaipou shisho-a souveayu sü baie; ana cheche moyu naye ngaorayu puh sü puh hrü souso louwe.

¹⁷Mah zhe vei kou pfü maisü panou athai koute veatheo, mai lia panou puhye soukha peiso.

¹⁸Chilih cheche-a tayu puh sü kaozhou veia taloulai, ana kaozümo ludu hinou tayu puhsü kaobvü hi deloulai.

¹⁹Kounou shopoa vah souyu mai sü toure alao bulai, ana komoyu liye thaihua buyu puh sü touha bailai.

²⁰Louchelou veiyu mai nasü vasa-a nou puhvei hrü hai hrüche loulai, ana thasho-a nou toungi nüyu maisü souvea peimoa panou talai moe.

²¹Mai zhai zhu-a soukuyu hai veimoe, ana chiku peiyu mai kamai louzü seihla titouli hinoua mah ta-a baiwe.

²²Toteiyu mai linou toungire donou tu-a laiwe, anou touhayu nou puh pei hi velaire touyu hai puhnou sümoe.

²³Maiye züa nou souzü peiyu nanou, haithai hi, maiye paovei paosho peiyu najünou maivei jüpa hai ngaopu loulai.

²⁴Pfüpuo maivei vaolou-a “Hai louzü mah moe,” tea paoyu puhsü avomai kukhe jünou veipu moe.

²⁵Tounü kayu mai linou züveiyu sü soupa peiwe, ana MAPAO ye lülouche louyu maiye sü soungi peilai.

²⁶Lahnou tsüchoyu naye loucheyu puhsü vomai li baie. Tsüvei puyu maili vei paodou peiyu sü züloua kaozhou vei-a bulou baio.

²⁷Touhayu maiye peiyu puh sü chelou jülai moe, ana nghithou pfüvaiyu puhsü chaa alao ngaolai.

²⁸Mai ashi nanou khouko bukhe khaie, maikhe maisü tuchü ta-a baiwe, ana puletao nou hata khaie, achechemai nou poupalai.