Read Poumei Naga TSÜCHITAO 29 Bible Online

TSÜCHITAO 29 - Poumei Naga bible

TSÜCHITAO 29

¹Mainou züpei khaie, nou khoulailai payu mai nasü souveilou hoyu hi soushikou khaipeia bailai.

²Acheche mainou nuh teidei khasa-a bukhai-e, maikhe mai hai lesawe; ana mai ashimai nou tukha soukhaie, maikhe mai hai chorosoua bubaiwe.

³Tsüvei jüpayu mai nanou puoye sousava peiwe. Ana khakhapfü taoye koa tayu hinou nangi soura hayu hai voyu vah baie.

⁴Vemai linou kaozü vanou tsüchoa bulouzü puhvei teidei hai duso palai, ana puhnou thoudzü likhei donou tsücho-a bailouzü puhvei teidei hai pepota-a baiwe.

⁵Mai linou puh kinapaye chechemoa paosho peiyu hai lah phi hi rüh southouyu büa baie.

⁶Maishiyu mai lisü lah vei mahtao vei rüh hinou muloua baiwe, ana achechemai liwo lado soua vasa-a nou bue.

⁷Achechemai linou touhamai livei zü süwe, ana maiashi mai linou süpaitea tsü hai sümoe.

⁸Maiye ngaoheiyu mailinou nuhdu sü mei shyao peiwe, ana tsüvei maiwo rarou nasü hulai peiwe.

⁹Tsüvei mai linou vomai liye veiva louzü, avona sü teisa nou rarou-a nüh-a baiwe; kaonayu sü lia bulai moe.

¹⁰Mai zhe teinüyu mainou tsüle sheeyu maiye ngaorawe, ana checheyu mainou puhvei hrirai vupa peiwe.

¹¹Avomai linou puhvei lekha veishi nou paopa khaiwe, ana tsüveiyu mai liwo shamealoua lekha nasü khaloua baiwe.

¹²Teidei khoyu mai linou mahyuna chi kei peilouzü, puh khenou vahsoumai hrülai nou mai ashi soukhai ta-a bailai.

¹³Touhayu maina-a alia souvea peiyupua raibüyu ali bue; MAPAO nou puhai mai ahai khihinou ava panou ngaoloure donou nghithou peikhei khaitoue.

¹⁴Vemai linou touhayu mai vei kaozü thaifüa chiku peilouzü, puhsü teile sho-a nuh teidei khasa-a hrükou loulai.

¹⁵Sühda ae tudei peiyu nah linou tsüvei peilai, ana lahdo souyu nah sünou puh pfüye hraongu pfüve peiwe.

¹⁶Mai ashimai nou khouko pfüyu phaki, mah souyu mai poupawe; ana puletao nou kaodu tayu sü acheche mainou ngaolai.

¹⁷Ne nahye tukha toulo, sükulouzü puhnou neye soyu peilai; puhnou neye sousava peilai.

¹⁸Ramai chipao hayu buh hisü, maikhe mainou shameayu ha-e, ana Ramai vei chikha züyu mai sü vasayu maitao-e!

¹⁹Chipao nou paodou peiyu likhei nou kilai mailiye souzü peilou hoe, daiolouzü puhnou süyuma popeilai moe.

²⁰Tsücho moa chi paohahayu mailia ne ngaoho moe? Sükuyu mai sü vomai nou areih bupu hie.

²¹Kilai mai liye taibu kinou puhnou jüpayu khaikho soupei louzü, akhai hio puh vei kikaa thaolou bailai.

²²Rarouyu mai linou souzüvei peiwe, alia lekha shimai lisü mah alao souloua baiwe.

²³Mai livei khaophu nanou puhye ponakou bailai, ana tainouti souyu mai nanou khuhaoyu sü ngaoloulai.

²⁴Vaomai liye koa pasouyu pusü puhye ngaoba kayu maina-e. Puhnou chikuyu buh hinou checheyu chi paopei louzü neye tudeelai, alia paomo louzü Ramai nou chaa peilai.

²⁵Maiye piyu haio rüh hi lou-a baiwe, ana MAPAO ye louche-a bulouzü zhouvei-a bailai.

²⁶Mai hrülai nou aduso maivei jüpa sounüe, ana MAPAO hinou mai linou kaozü nasü ngaolouwe.

²⁷Mai ashi maiye sü acheche mainou ngaora-e, ae acheche maiye mai ashimai nou ngaora-e.