Read Poumei Naga TSÜCHITAO 30 Bible Online

TSÜCHITAO 30 - Poumei Naga bible

TSÜCHITAO 30

¹Chipao haitao hai Jakeh nahpoutu Agur vei chipaotao-e: “Ramai sü Eye koa bumoe, Ramai sü ahi ha-e, ae E sü souloure khouko lia hare.

²Cheche vuzünou Ewo maili soure donou chemoe, Ahio mai linou pfüyu tsü-a ha-e.

³Enou tsüvei doulou more, ae Enou Ramai vanou haliro sülou more.

⁴Thaonou raki hi khewu-a khaikou louyu bue? Thaonou teikhaiye puh bah hinou pojü louyu bue? Thaonou sah hinou dzü beh louyu buge? Thaonou deiphao kainghou veishi soushu loue? Nenou sülouzü, puh zhih sü thaotoue? Puh nahpoutu sü thaoge?

⁵“Ramai vei chipao veishi nou cheche-a baie! Puhvei vuapei phouyu mai sü puh hai rü büa bue.

⁶Puhnou paomoyu chipao lihai puhnou paowe tea paolouzü, Puhnou neye souvea peia bailai alia neye dayu maili soua poloua bailai.”

⁷Oh Ramai, ne hinou E na ahai kholai; sühaisü E thaimo jünou pa ngaolouyu sü soupeio:

⁸Ahinou dayu nasü doushoa polai peio; alia Eye touha shoyua moa toungi shoyua peiso; Eye rukhalou süyu touso sü peio.

⁹Hakinou E hai toungi sholou louzü, neye malaiwua “MAPAO sü thaoe?” tea paoshulai. Mokhaia E hai touha sholouzü, maivei vaota-a avei Ramai zhih sü soushi shulai.

¹⁰Kilai mai aliye puhvei paopu nghoujü hinou paoshiso, paolouzü puhnou neye chaa peishulai, ae ne sü mahyu hi loushulai.

¹¹Lah puo ye chaayu alia lah pfüye paosho moyu mai-a bue.

¹²Lah nghithou hinou sheesha touyu mai-a bue, ana puh sü lah vei houshi hinou khüshee loumoe.

¹³Lahye veisho-a choyu mai bue, alia puhnou lahye daizhou koute veisa tea cho-e!

¹⁴Kamai-o puhmai huh hai khoche büa buyu mai bue, kamai huh-o kaiti büa puletao nou deiphao hi touha-sohayu maitaoye souhalai tea bue.

¹⁵Vaa hai nahnaotu ahai bue, ae puhai zhih sü “Eye peio,” tea sapei khaitoue. Rukha khaimoyu na adai bue:

¹⁶Rabedushao, nahapfü vei nahbvü, teirü jüpa-a buyu dei the, alia nulouhoyu meikei.

¹⁷Puo maiye ngaoheiyu maitao alia tsükhaivu payu thai pfü maiye ngaophou moyu maitaoye sü lüche panou toulouyu kaobaie, moyuma rashopeiki panou puletao vei nghithou sü daola pa-a kaobaie.

¹⁸Na asü hai Eye donou khupa shore; adai nasü Enou sülou hore:

¹⁹Lüche nou tei hinou zhaoyu, nghou nou chuhlya hinou tayu, dzüluki nou zai pei hinou ludu phouloua tayu, alia naotu maili ae poutu maili leshi louyu haitaoe.

²⁰Chilih moyu maipfü linou haibüa hrüwe: honapai nou khulou vah soulouyu thai, dzü khüloua haibüa paoe, “Enou vah mahlia soumoe!”

²¹Na asü khehinou deiphao sü nguwe; ae adai na puhnou healou hore:

²²qila mai linou pa vekou louyu, vomai linou tounüyu veishi toulouyu,

²³lesha hayu naotumai linou maipuo ngaolouyu, alia kilaipai nou paopai buh pa thaolouyu haitaoe.

²⁴Deiphao hi taishoyu hrikhaona adai bue, ana sütao hai tsüdo veishowe:

²⁵Chasei: puletao hai lülouhoyu khaona touli baie, ana puhtao nou teilü kinou touso pojü louwe.

²⁶Chukhaotu: puhtao-a lülouhoyu khaonatou baie, ana puhmai nou chuhlya hinou ki soubuwe.

²⁷Khazü: puhtao hisü veo hae, ana puhtao nou me souloua zhaotawe.

²⁸Harakiki: nenou puhye sü bah nou nülou süe, ana puhtao hai veo vei ki hinou ve bu-a baiwe.

²⁹Na adai hai puletao nou tayu zhai ngaoloua ngaovei showe:

³⁰Kipeikhaodu hai soukhaonatao hinou khoukayu khaona alie ae halia ngaopi chamoe;

³¹Nghitsü, Dulapo-a tayu houdzü, alia veo nou puhvei maitao nghoujü nou phika kayu.

³²Hakinou ne hai avomai lisoua lahnou lahye kushoa tsücho-a bulouzü, moyuma hashi soure donou roh-a bulouzü, ne bah sünou ne mü hi thoulo.

³³Daiolouzü chonaodzü hai vapei khaige, chonaodzüke popalouwe. Nenou maili vei nghou dapeiyu phaki zhe pawe, alia lekha daipa peikhaie, züveiyu pawe.