Read Poumei Naga TSÜCHITAO 31 Bible Online

TSÜCHITAO 31 - Poumei Naga bible

TSÜCHITAO 31

¹Chipao haitao hai Veo Lemuel vei pfünou puhye paodou peiyu chitaoe:

²“Ne hai Enou leshi shoyu anahpoutue, Enou veachi paoyu chila nasüe. Enou ne hisü dai-e paopeilai?

³Nevei khouko sü naotumai hi peisouo, vemaiye souhare ludu hilao tasouo.

⁴Sükhesü vemai donou moe, O Lemuel, vemai hai zhaoh soyu kao moe, zhaoh sü vemai linou thainüyu kaomoe.

⁵Puhmaitao nou zhaoh sore touyu thaisü, chikhatao hai ngai-a bailai, alia maikhe maitao hi souzü vahtao hai souche peimoa poreilai-a bailai.

⁶Zhaoh hai thailaiyu maitao hi peio, alia le pepoa buyu mai hi peio;

⁷puletaoye panou soloua puletao vei touhayu ae veahoyu nasü ngaiwuo.

⁸“Chi paolou sümoa buyu maitao donou chi paopeio. Veahoa laiyu maitao vei zü sü vupeio.

⁹Puletao thaosoua chi paopeio ae checheyu hinou chiku peio. Touha sohayu maitao vei zü vupeio.”

¹⁰Maipfü veili hai thaonou ngaolou süe? Puhsü mutei chuh jünou mutei puhie.

¹¹Puhvei khapuo nou honapai ye louchewe, alia puhsü touha sohalai moe.

¹²Hopainou puh hisü vah veih soupeiwe, hopai vei hrüsasü hashi soukhai toulai moe.

¹³Honapai nou kounou shopoa nou soumaisah alia züzüyu sabanü sü souloua banouwe.

¹⁴Honapai nou huha souyu maivei dzüluki ali büa ki hisü touso hai pove peiwe.

¹⁵Honapai nou teithemo-a buki nou kushu loue, ae puh kikhamaiye touso soupeiwe, alia kilai mai hi vah lüpeiwe.

¹⁶Honapai nou ki-lu khesü zhuloua hülouwe, lahnou kuluyu sana nou darkha kipei soulouwe.

¹⁷Honapai nou khya sü khochü touloua puh baokao sü soukhou louwe.

¹⁸Honapai nou puhvei na sü huhpa bue touyu rai-a sülouwe, honapai vei meivabvü sü khei teile hi-a ngheitu moe.

¹⁹Honapai bah sü louhmü hi khaiwe, alia lah vei sabanü sü daoloua baiwe.

²⁰Honapai hai touha sohayu mai hi lülah veihshoe.

²¹Honapai nou puh kikhamai donou vürah ye ngaopi moe, daiolouzü puhnou lah kikhamaiye donou banoure sabanü rai-a tuda khaiwure.

²²Honapai hai lahvei züsah rülouwe, ae kikha maiye sabanü veisho-a tupeiwe.

²³Honapai vei maipuo hai mainou shiha loua baiwe, ae puh sü nuh hi matsüyu maitao hrohi loulouwe.

²⁴Honapai nou veishoyu sabanü ae khyakho khesü souloua huha souyu mai hi zolouwe.

²⁵Honapai sü khouko bue ae mainou tsükhou peiwe, alia honapai nou vere teithe donou ngaopiyu hae.

²⁶Honapai hai chipao lako aveih ae ratsü loua chi pao-a baiwe.

²⁷Honapai nou puh kikhamai vei ludu sü zhutou louwe, alia sato touwu moe.

²⁸Puhvei nahmaitao nou puhye hra ngaolouyu pai tea kuwe, honapai vei khapuo nou puhye sü paoshowe.

²⁹“Veishoyu naotumai alao bue, ana puletao mai hrülai jünou ne-a veihkae,” tea puhnou paoe.

³⁰Mainü nanou souvo peiwe, alia hüveiyu hai hako baie, ana MAPAO ye piyu naotu maiye paosho züo.

³¹Honapai nou soupfüyu vah teitei sü puh hi buu peikhaio, alia mai hrülai nou puhye sü paosho züe.