Read Poumei Naga TSÜCHITAO 6 Bible Online

TSÜCHITAO 6 - Poumei Naga bible

TSÜCHITAO 6

¹Anahna, nenou kinapa maili vei müpfü louzü, shetumai li hi chaachou souwu louzü;

²ne lah nevei münou paopayu chipao hinou muloure toulouzü; ne lah nevei chipao hinou phumu loure louzü;

³süthaisü haibüa soulo, anahna, alia neye lah vupalo, daiolouzü ne sü nevei kinapamai vei khouko khe hinou bure: thalasou taho nasha-a nevei kinapa hinou ra-a neye phapeio tea kholo.

⁴Sünasü ne souloumo koute zhitawuso, moyuma sochaoso.

⁵Kho-shu ali nou souhuyu mai nghoujü hinou tavai louyu büa moyuma rüh southou khaitouyu hinou raohou ali nou tupa louyu büa ne tupalo.

⁶Heakayu maitaore, taho chasei hinou douloua tsüveilo.

⁷Puletao hai süthai-apeio, peikhowo, ae veo tiyu lia ha-e,

⁸ana puletao hai teilü kinou touso hai teisaiki toure donou souda khailouwe.

⁹Oh shakawo, teile kaso ne züphao hinou dazüa bulaige? Ne zhi-a buyu sü teile kapha hinou kaishu laige?

¹⁰Dazü kholoulai hie, zhikho touloulai hie, bah khyapoa sokho touloulai hie tea bulouzü,

¹¹touha sohayu nou haolai mai ali büa ne hisü ve-a bailai, alia nevei jüpa nou reihmai ali büa velai.

¹²Muh hayu maili, mai ashi maili nou dadouyu chipao paopoa tawe.

¹³Nghei nou maichouwe, phinou puuwe, batou nou tewe,

¹⁴kaozümo tsüle pfüa shodo ashi tsüchodawe, thaokhai timoa sha southou peiwe.

¹⁵Südonou veahoyu sü puh hisü süngaokhai moa velai; nghimaisü lihinou puhsü souveilou hoyu hi koute soushi khaiwulai.

¹⁶MAPAO nou ngaorayu alia healou hoyu na anai bue: khaosouyu nghithou, dayu mali, mah lia hayu mai zhe soupayu bah, do ashi phouyu lüthou, ashi hi thashoa tuhoyu phi, dahrührüa dashakhi soumai, alia thaihou-jürai mai hrohi sha southou apeimai.

²⁰Anahna, ne puo vei kharochi sü zütoulo, alia ne pfü vei paodou-apei sü ngaiso.

²¹Chipao sütao sü ne lüthou hi khaikou telo, ne ngarao hi phupa khailo.

²²Nenou tapayu phaki, sütaonou neye süthaita peilai; nenou dazüa buyu phaki, sütaonou neye khopeilai; alia nenou kaishuyu phaki, sütaonou neye chaku peilai.

²³Daiolouzü paodou-apei sütao hai meivabvü alie, alia tudee peiyu sütao hai ahri vei ludue.

²⁴Sütao nou neye naotu shiyu maitao hinou povailai peilai, maiye züa thaoyu naotu maitao vei müvei müthea hinou vupa peilai.

²⁵Houmaitao vei hüveiyu nasünou pa neye seilouso, alia puletao vei nghi pheiyu sünou neye panou nülouso.

²⁶Daiolouzü khakha maipfü liwo raokhao alinou poa ngalou süe, ana chilee moa khulou souyu haina nou puhvei buyu na veishi sü pota-a bailai.

²⁷Mai alinou mei hai taopa khaimoa puhvei sabanü hinou hopoa bulou süwu?

²⁸Mokhaia mailinou meithou peinou puh phi deimoa talou süvu?

²⁹Sübütoua baie, kinapa maivei chapfü hi talouyu mai nasü; honapaiye deiyu mai sü souvea peimoa panou talai moe.

³⁰Mai linou houzüyu vanou maivei vaotou louzü, mai nou puhye ngaora moe.

³¹Anou puhye mainou nüloure touyu thaisü, puhsü deida anai hai zholai; puhvei ki hi buyu na veishi peilai-a bailai.

³²Ana maiye sapayu mai nasü tsülia hare; puhsü lahye soushi lou-a baie.

³³Puhsü zhizhu louyu alia tsükhou hayu ngaoa bailai, alia puhsü teisa nou hraongu pfüa bailai.

³⁴Daiolouzü ngaoraiyu hai nanou mai livei lekha daipa-a baiwe, alia puhnou khüngu phouyu phaki, halia phapei laimoe.

³⁵Puhnou seihla peia aetoulai moe, alia deida alao peiyuma rukhalai moe.