Read Poumei Naga KOPAODOUWO 10 Bible Online

KOPAODOUWO 10 - Poumei Naga bible

KOPAODOUWO 10

¹Thaiyu khaomai alinou kaivei pousoupu vei pou panou kai-ashi pawe; sübüa voyu vah titu linou tsüvei-a zhih tayu ae tsükhouyu souha baiwe.

²Tsüvei mai livei lethou hai zhoulova kaovewe, ana avomai livei lethou-o nalova kaovewe.

³Avomai nanou ludu hi tabu-a puhsü tsüvei hae, alia puh hai voyu mai alie tiyu hai mai hrülai hi ngaowe.

⁴Teidei khoyu mai linou ne pei hi rarou-lekhayuma, nevei vahbu nasü thaowuso, daiolouzü nenou naasei teanou bulouzü mah aduduli-a khaipei lousüe.

⁵Teinghi khehnou ashi li buyu Enou ngaoe, süsü vemai hinou ve-e:

⁶Avo maiye buh kuyu taoli hinou khaipeiwe, alia toungiyu maiye sü buh nayu hi panou bubaie.

⁷Kilai mainou rheiphao hi bua Enou ngao-e, alia veo nahmaitao nou kilai mai büa phinou tawe.

⁸Mai taralia deibvü raoyu nasü sühi delou bailai; alia bouvo souphe poa louyu nasü nghou nou daolai.

⁹Chuhtao laayu maina sü süna vanou ziloulai; ae süülao seiyu maina-a süna hinou kaozhoushi daoloure bue.

¹⁰Marei mü shiyu hai nenou hei roulou molouzü, nevei pfüchi alao loupua nou ne poa vah soulai; ana rai-a tsüchoda louyu nanou veipu hie.

¹¹Nghou liye soume loumo jünou daowu bailouzü, kochaoyu maina vei koyu lia hae.

¹²Tsüvei mai livei chipao nou puhye jüpayu pove peiwe, ana avomai livei mütai nou puhye toulou baiwe.

¹³Puhvei lako beihsü voyu nae, alia luyu ashi nanou puhvei chipao akhai souwe.

¹⁴Voyu mai linou thaokhai timoa raobaiwe. Mai linoua daie palai tiyu sümoe, alia puh thailo daie palai tiyu thaonou paolou süe?

¹⁵Avomai livei terou nanou puhye souveawe, daiolouzü puhnou nuhdu hi tare ludu koute-a sümoe.

¹⁶Iyaho, Oh thaomai teidei hi kilai mainou veo soua busa, alia veo nahmaitao nou hea-khei sümoa nou khonüh nüa busa!

¹⁷Lesayu teidei sü, Oh neletaore, vah soulou süyu mai linou neletao vei veo souyu hai, alia teile kaolu hinou veo nahmaitao nou khonüh nüyue, süsü khouko ngaore donou baie, touso zhire vanou moe!

¹⁸Shakayu vanou kichü vülouwe, alia hikeiyu donou kidzü zhaowe.

¹⁹Khonüh hai nüre vanou souwe; zhaoh hai hrü sousare donoue, alia sana raka nou hali hala vei chila peiloue.

²⁰Nevei tsüle hi koute-a vemaiye chaaso, moa ne zübuki hinou toungi maiye chaaso; daiolouzü teikhai hi buyu raohou nou ne pai hai pfüa ta-a bailai, moa shou pfüyu khaona linou süsü paowu bailai.